Bakıda ölümlə nəticələnən yol qəzası törətməkdə təqsirləndirilən Qərib Eyvazlı və Əli Abdullayevin barəsindəki hökmdən apellyasiya şikayəti və protesti verilib.
APA-nın xəbərinə görə, cinayət işi Bakı Apellyasiya Məhkəməsində hakim Rizvan Səfərovun icraatında araşdırılacaq. Məhkəmənin ilkin baxış iclası dekabrın 13-nə təyin edilib.
Qeyd edək ki, ötən ilin mart ayında Binəqədi-Mehdiabad yolunda Bakı sakini Ə.Abdullayevin idarə etdiyi "Range Rover" markalı avtomobil Q.Eyvazlının idarə etdiyi "VAZ-21015" markalı maşınla toqquşub.
Nəticədə "VAZ-21015" markalı avtomobildə olan Ramiz Muradov və Elgün Məmmədov aldıqları xəsarətdən ölüblər.
Bakı Ağır Cinayətlər Məhkəməsinin hökmü ilə Q. Eyvazlı 8 il müddətinə azadlıqdan və 3 il avtomobil idarə etmək hüququndan məhrum edilib.
Əli Abdullayevin isə əməlində cinayət tərkibi olmadığından barəsində bəraət hökmü çıxarılıb, məhkəmə zalından azadlığa buraxılıb.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
