Bakı – APA. Türkiyədə təlim-məşq toplanışında olan Bakının “İnter” klubu bu gün 2-ci yoxlama oyununu keçirib. Apasport.az saytının məlumatına görə, paytaxt təmsilçisi Almaniyanın “Verder” klubu ilə qarşılaşıb.
İki gün əvvəl Bremen təmsilçisinin əvəzediciləri ilə qarşılaşan Zaur Svanadzenin yetirmələri bu dəfə də 0:1 hesabı ilə uduzub. Belə ki, Almaniya klubunun əsas komandası da əvəzediciləri kimi 1 qolla matçın taleyini həll edib.
Bundesliqanın 4 qat çempionu, 6 dəfə Almaniya kuboku, 1991/92 mövsümündə Kuboklar Kubokunu qazanan “Verder” qələbə qolunu matçın ilk yarısında vurub. Görüşün 42-ci dəqiqəsində fərqlənən Klaudio Pizarro komandasına qələbə qazandırıb. 38 yaşlı perulu hücumçunun qolundan sonra komandalar hesabı dəyişə bilməyib.
Qeyd edək ki, “İnter” növbəti oyununu yanvarın 19-da Çexiyanın “Slovan” (Liberets) klubuna qarşı keçirəcək.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
