Hadisə

Ana səhifə

Hadisə

Beynəlxalq Bankdan kredit götürüb qaytarmamaqda ittiham edilən televiziya təsisçisinin həbs müddəti artırılıb

06 sentyabr 2016 12:49 (UTC +04:00)

Bakı. Şəhriyar Əlizadə -APA. Azərbaycan Beynəlxalq Bankı ilə bağlı başlanılmış cinayət işi üzrə saxlanılan Səməd Sadıqovun həbs müddəti uzadılıb.

Vəkil Elçin Sadıqovun APA-ya verdiyi məlumata görə, Nərimanov rayon Məhkəməsinin qərarı ilə “CityTV” televiziyasının təsisçisi Səməd Sadıqovun barəsində seçilmiş həbs qətimkan tədbiri noyabrın 12-nə qədər artırılıb.

S. Sadıqov “Azərbaycan Beynəlxalq Bankı” ASC-dən 4 milyon 410 min manat kredit götürərək qaytarmamaqda ittiham edilir.

2015-ci ilin oktyabr ayının 12-də S.Sadıqov barəsində Nərimanov Rayon Məhkəməsində iki ay müddətinə həbs qətimkan tədbiri seçilib. Daha sonra iş adamı barəsində seçilmiş həbs qətimkan tədbirinin müddəti bir neçə dəfə uzadılıb.

O, Cinayət Məcəlləsinin 178.3.2-ci (dələduzluq, külli miqdarda ziyan vurmaqla törədildikdə) maddəsi ilə ittiham olunur.

Xatırladaq ki, 2015-ci il oktyabrın 11-də Dövlət Sərhəd Xidməti əməkdaşlarının keçirdiyi əməliyyat-axtarış tədbirləri nəticəsində Balakən rayonu Mazımçay kəndi ərazisindəki zastavanın xidməti sahəsindən dövlət sərhədini Azərbaycandan Gürcüstan istiqamətində pozmağa cəhd göstərən Səməd Qüdrət oğlu Sadıqov saxlanılıb. Rəsmi məlumata əsasən, müəyyən edilib ki, S.Sadıqov dövlət banklarına olan külli miqdarda borcunu ödəməkdən yayınmaq məqsədilə ölkəni qeyri-qanuni yolla tərk etmək niyyətində olub.

Onu da qeyd edək ki, Azərbaycan Beynəlxalq Bankın İdarə heyətinin sabiq sədri Cahangir Hacıyevin barəsində ötən il dekabrın 5-də Nərimanov rayon Məhkəməsinin qərarı ilə 4 ay müddətinə həbs qətimkan tədbiri seçilib. C. Hacıyev Cinayət Məcəlləsinin 179-cu (mənimsəmə) və 308-ci (vəzifə səlahiyyətlərindən sui-istifadə etmə) maddələrinə əsasən ittiham olunur. Hazırda onun və digər bir neçə nəfərin cinayət işi üzrə məhkəmə prosesi davam etdirilir.

Ümumilikdə Azərbaycan Beynəlxalq Bankından kredit götürərək mənimsəməkdə təqsirləndirilən 30-dan çox şəxs saxlanılaraq barələrində həbs qətimkan tədbiri seçilib.