Sahibkarlıq

Ana səhifə

Sahibkarlıq

Azərbaycanla Latviya arasında ticarət dövriyyəsi 29% artıb

20 oktyabr 2017 15:15 (UTC +04:00)

İqtisadiyyat naziri Şahin Mustafayev Latviyanın Azərbaycandakı səfiri Yuris Maklakovsu qəbul edib.

Nazirlikdən "APA-Economics"ə verilən məlumata görə, görüşdə Ş.Mustafayev Azərbaycan və Latviya arasında əlaqələrin inkişafına dövlət başçılarının xüsusi önəm verdiyini, bu ilin iyulunda Azərbaycan prezidenti İlham Əliyevin Latviyaya səfəri çərçivəsində ölkələrimiz arasında bir sıra sənədlərin imzalandığını diqqətə çatdırıb.

Bildirilib ki, bu ilin ilk 8 ayı ərzində ölkələrimiz arasında ticarət dövriyyəsi 29% artıb, Azərbaycanda Latviya kapitallı 38 şirkət fəaliyyət göstərir.

Ölkəmizdə əlverişli biznes və investisiya mühitinin olduğunu vurğulayan nazir Latviya iş adamlarını Azərbaycanda iqtisadiyyatın müxtəlif sahələrinə, o cümlədən sənaye parklarına və aqroparklara, Ələtdə yaradılmış azad ticarət zonası tipli xüsusi iqtisadi zonaya investisiya yatırmağa dəvət edib. Vurğulanıb ki, Azərbaycan regionun tranzit qovşağıdır və bu sahədə iri layihələr həyata keçirilir. Latviya Azərbaycanın tranzit imkanlarından istifadə edə bilər.

Azərbaycan və Latviya arasında iqtisadi əlaqələrin inkişafı üçün böyük potensialın olduğunu vurğulayan nazir ölkələrimizin sənaye, turizm, kənd təsərrüfatı sahələrində də əməkdaşlığı daha da inkişaf etdirə biləcəyini qeyd edib.

Səfir Latviyanın Azərbaycanla ikitərəfli əlaqələrin genişləndirilməsində maraqlı olduğunu diqqətə çatdırıb, ölkələrimiz arasında iqtisadi əməkdaşlıq imkanlarına dair fikirlərini bölüşüb.