Azərbaycanın əlverişli tranzit imkanlarının xarici ölkələrdə tanıdılması istiqamətində tədbirlər davam etdirilir. İqtisadiyyat Nazirliyindən “APA-Economics”ə verilən məlumata görə, Trans-Xəzər Şərq-Qərb Ticarət və Tranzit Dəhlizinin əhəmiyyətinə həsr olunmuş növbəti tədbir Almaniyanın Berlin şəhərində keçirilib.
Tədbirdə Azərbaycanın aidiyyəti qurumlarının nümayəndələri ilə yanaşı, Almaniyanın yükdaşımalarla məşğul olan logistik şirkətlərinin 100-ə yaxın nümayəndəsi iştirak edib.
Alman-Azərbaycan Forumunun idarə heyətinin üzvü, "Deutsche Bank"ın Mərkəzi və Şərqi Avropa ölkələri üzrə icraçı direktoru Peter Tils, Azərbaycanın Almaniyadakı səfiri Ramin Həsənov və Alman İqtisadiyyatının Şərq Komitəsinin icraçı direktoru Mixael Harms salamlama nitqi ilə çıxış ediblər.
R. Həsənov çıxışında ölkəmizin iqtisadiyyatının şaxələndirilməsində və qeyri-neft sektorunun inkişafında nəqliyyat sektorunun əhəmiyyətini vurğulayıb və Azərbaycanın transregional nəqliyyat bağlantılarının daha da gücləndirilməsinə verdiyi töhfə barədə danışıb. O, Azərbaycanın həyata keçirdiyi regional layihələr və alman şirkətləri üçün yaranan biznes perspektivlərini qeyd edib.
M. Harms çıxışında cari ildə Azərbaycanda səfərdə olduğunu və təmsil etdiyi Alman İqtisadiyyatının Şərq Komitəsinin gələn il ölkəmizə yüksək səviyyəli nümayəndə heyətinin səfərini həyata keçirəcəyini bildirib. O, Azərbaycanda dinamik inkişafın şahidi olduğunu, müxtəlif sahələrdə iqtisadi islahatların aparıldığını və nəqliyyat və logistika sahələrində əməkdaşlıq üçün yeni imkanların yarandığını vurğulayıb.
Tranzit Yükdaşımalar üzrə Koordinasiya Şurasının ofis rəhbəri Elçin Əhmədov əlverişli geostrateji mövqeyə malik olan Azərbaycanda nəqliyyat infrastrukturunun təkmilləşdirilməsi, ölkəmizin tranzit potensialının reallaşdırılması, nəqliyyat dəhlizlərinin inkişafı istiqamətində görülmüş işlər barədə məlumat verib. Qeyd edilib ki, Trans-Xəzər Şərq-Qərb Ticarət və Tranzit Dəhlizi Çinlə Avropa arasındakı ən qısa marşrut olduğundan, tranzit və yükdaşıma baxımından səmərəlidir. Şərq-Qərb nəqliyyat dəhlizinin tranzit müddəti 15 gündür. Dəhliz boyu sabitlik və təhlükəsiz, dəhliz dövlətləri arasında sıx əməkdaşlıq, müasir standartlara cavab verən infrastruktur Şərq-Qərb nəqliyyat dəhlizinin önəmini daha da artırır. Bu dəhliz Çinin "Bir kəmər - Bir yol" təşəbbüsünün mühüm komponentinə çevrilib.
Trans-Xəzər dəhlizi üzrə yükdaşımaların üstünlüklərindən bəhs edən "ADY Container" MMC-nin direktoru Natiq Cəfərov və Dövlət Dəniz Administrasiyasının aparat rəhbəri Əhməd İsmayılov dəhliz üzrə daşımaların artırılması imkanları, marşrut boyu "bir pəncərə" sisteminin tətbiqi, regional tərəfdaşlığın gücləndirilməsi, regionda həyata keçirilən infrastruktur layihələri barədə məlumat veriblər.
Bakı Beynəlxalq Dəniz Ticarət Limanı baş direktorunun müşaviri Tural Əliyev limanda azad ticarət zonasının yaradılması və onun regionda nəqliyyat-logistika qovşağına çevrilməsindən bəhs edərək investisiya imkanlarını diqqətə çatdırıb.
Dövlət Gömrük Komitəsinin nümayəndəsi Fərid Vəliyev Azərbaycanda sərhəd keçid və gömrük rəsmiləşdirilməsinin sürətləndirilməsi və bu sahənin müasir standartlara çatdırılması istiqamətində aparılan işlər barədə məlumat verib.
Sonra tədbir iştirakçılarının sualları cavablandırılıb, iştirakçılar arasında olan "Ardelt" şirkətinin nümayəndəsi təmsil etdiyi şirkətin istehsalı olan 6 ədəd portal kranının Bakı Beynəlxalq Dəniz Ticarət Limanı üçün təchiz edilməsi layihəsi barədə məlumat verib, Azərbaycandan biznes mühitinin əməkdaşlıq üçün əlverişli olduğunu iştirakçıların diqqətinə çatdırıb. Forum çərçivəsində Almaniya logistik şirkətləri ilə ikitərəkli görüşlər keçirilib, müzakirələr aparılıb.
Bizi Telegram-da izləyin
t.me/apa_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
