Sənaye və energetika

Bakıda mədən sənayesində şəffaflığın artırılması mövzusunda dəyirmi masa keçirilib

21 noyabr 2008 12:29 (UTC +04:00)

Bakı. Elnur Hüseynquluyev – APA-Economics. Bu gün Bakıda Mədən Sənayesində Şəffaflığın Artırılması Koalisiyası «Mineral ehtiyatların hasilatı ilə məşğul olan sənaye sahələrində şəffaflıq təşəbbüsünün Azərbaycan Respublikasında tətbiqinə dair qarşılıqlı anlaşma haqqında memorandumun icrasının 5-ci ili: ötən dövrün qazancları və gələcək dövrün tələbləri» mövzusunda dəyirmi masa keçirib.
«APA-Economics»in məlumatına görə, tədbirdə Koalisiyanın əlaqələndiricisi Qubad İbadoğlu təşkilatın yaradılması, fəaliyyətinin əsas istiqamətləri və bu müddət ərzində əldə olunan nəticələrdən danışıb.
Q.İbadoğlunun sözlərinə görə, şəffaflıq təşəbbüsü sahəsində Azərbaycan beynəlxalq aləmdə kifayət qədər tanınıb, həmçinin hökumətlə vətəndaş cəmiyyəti arasında münasibətlərin əsası qoyulub.
İqtisadi və Siyasi Araşdırmalar Mərkəzinin direktoru Sabit Bağırov isə öz növbəsində mədən sənayesində şəffaflıq təşəbbüsünün Azərbaycanda tətbiqinə dair qarşılıqlı anlaşma haqqında memoranduma əlavə və dəyişikliklərin edilməsi barədə koalisiyanın təkliflərini qeyd edib.
S.Bağırovun sözlərinə görə, memorandumun təkmilləşdirilməsinə ehtiyac var. Belə ki, bu günə qədər dövlət qurumlarından bəziləri gəlirləri barədə hesabat vermir. Hesabatda yarımillik və illik hesabatların hazırlanması tarixləri deyil, təqdim edilməsi tarixləri göstərilir: «Ümumiyyətlə, mədən hasilatında şəffaflıq təşəbbüsü (MHŞT) hesabatında bəzi subpodratçının ödədiyi vergilər, icarə haqqı, sosial vergilər və işçilərin gəlir vergisi haqqında gəlirlər əks olunmayıb. MHŞT ilə əlaqədar koalisiyanın bir sıra narahatlıqları var. Belə ki, MHŞT gəlirlərin böyük qismini əhatə etsə də, bəzi gəlir növləri təşəbbüs xaricində qalır. MHŞT neft gəlirləri ilə əlaqədar ictimaiyyəti maraqlandıra bilən sualların yalnız bir qisminə cavab verir».
S.Bağırov bütün bunları nəzərə alaraq, anlaşma memorandumunun birinci bəndinə dair təklifləri bildirib. Təklifdə hökumətin hesabatının açıqlanması tarixinin göstərilməsi, hesabat təqdim edən dövlət orqanları və şikayətlərin adlarının çəkilməsi, həmçinin işçi qrupu barədə müvafiq qeydlərin edilməsi əksini tapıb. S.Bağırov bununla yanaşı memorandumun 2-ci, 5-ci, 6-cı və 7-ci bəndlərinə də müvafiq əlavə dəyişiklərin edilməsi təklifi ilə çıxış edib.
Qeyd edək ki, Koalisiya 2004-cü ilin may ayının 13-də yaradılıb.