Sənaye və energetika

USAİD Azərbaycanda neftlə çirklənmiş torpaqların təmizlənməsi sahəsində həyata keçirilən layihələri dəstəkləməyə hazırdır

25 noyabr 2008 15:41 (UTC +04:00)

Bakı. Nicat Mustafayev – APA-Economics. Azərbaycan Respublikası Dövlət Neft Şirkətinin (ARDNŞ) prezidenti Rövnəq Abdullayev ABŞ-ın Beynəlxalq İnkişaf Agentliyinin (USAİD) administratoru və ABŞ-ın xarici yardımlar üzrə direktoru xanım Henrietta Forun başçılıq etdiyi nümayəndə heyətini qəbul edib.
ARDNŞ-dan «APA-Economics»ə verilən məlumata görə, görüşdə USAİD ilə ARDNŞ arasında əlaqələrin son dövrlərdə genişləndiyini vurğulayan R.Abdullayev qeyd edib ki, ötən il ARDNŞ ilə USAİD arasında Transxəzər neft və qaz kəmərinin texniki-iqtisadi əsaslandırılmasının hazırlanmasına dair imzalanmış qrant sazişi buna nümunədir. Həmin istiqamətdə işlərə başlandığını deyən ARDNŞ prezidenti Azərbaycanın artıq tək neft deyil, həm də iri qaz ixracatçısına çevrildiyini söyləyərək, bu gün Azərbaycan qazının Türkiyə və Gürcüstana ixrac edildiyini bildirib. Gələcəkdə ölkənin Avropanın enerji təhlükəsizliyinin təmin edilməsində mühüm rol oynayacağına əminliyini bildirən R.Abdullayev, eyni zamanda Azərbaycanın Mərkəzi Asiyadan karbohidrogenlərin Avropaya ixracı yolunda tranzit ölkə rolunu oynamağa, bu məqsədlə öz infrastrukturunu təqdim etməyə hazır olduğunu vurğulayıb.
Bundan başqa, Qafqaz enerji dəhlizinin uğurla fəaliyyət göstərdiyini vurğulayan ARDNŞ prezidenti bu günlərdə Qazaxıstanla bu ölkədə hasil edilən neftin Xəzər dənizi və Azərbaycan ərazisi ilə, Bakı-Tiflis-Ceyhan kəməri vasitəsilə nəqlinə dair imzalanan sazişi qeyd edərək, digər region ölkələrinin də bu enerji dəhlizindən istifadə etmək üçün maraq göstərəcəyinə ümidvar olduğunu bildirib.
Öz növbəsində, Bakıda keçirilən IV Enerji Sammitini və onun nəticələri əsasında qəbul edilən Bakı Bəyannaməsini yüksək qiymətləndirən xanım H.For qeyd edib ki, Azərbaycanın enerji diversifikasiyası məsələsində bundan sonra da fəal rol oynayacaq.
USAİD ilə ARDNŞ arasında əməkdaşlığın genişlənməsindən məmnunluğunu bildirən xanım H.For təmsil etdiyi qurumun Azərbaycanda neftlə çirklənmiş torpaqların təmizlənməsi məsələləri ilə maraqlandığını və bu sahədə şirkətin həyata keçirdiyi layihələri dəstəkləməyə hazır olduğunu bildirib.
R.Abdullayev onu da qeyd edib ki, «Azərbaycanda ekoloji vəziyyətin yaxşılaşdırılmasına dair 2006-2010-cu illər üçün Kompleks Tədbirlər Planı»na əsasən, ARDNŞ-in öz üzərinə düşən məsələlərin öhdəsindən uğurla gəlir.