Sənaye və energetika

Azərbaycan şin istehsalçısını özəlləşdirməyə çıxarıb

10 dekabr 2008 07:55 (UTC +04:00)

Bakı. Rəşad Süleymanov – APA-Economics. Azərbaycan Dövlət Əmlakının İdarə Edilməsi üzrə Dövlət Komitəsi (DƏİEDK) «Azərşin» ASC-nin səhmlərinin 96,98%-nin (85% + əmək kollektivi üzvlərinə səhmlərin güzəştli satışından qalan 11,98%) satışı üzrə investisiya müsabiqəsi elan edib. Müsabiqədə yerli və xarici investorlar iştirak edə bilərlər. Bu barədə «APA-Economics»ə DƏİEDK-dən məlumat verilib.
Müsabiqəyə yekun vurularkən müəyyən edilmiş şərtlər nəzərə alınmaqla maksimum həcmdə investisiya təklif etmiş və onun səmərəli qoyuluşu üzrə öhdəlik götürmüş iddiaçıya üstünlük veriləcək.
Bakı şəhəri, Nərimanov rayonu, Araz küçəsi,8 ünvanında yerləşən müəssisənin nizamnamə kapitalı 1 788 628 manat, buraxılmış səhmlərinin sayı 894 314 ədəd, səhmlərinin növü sənədsiz adlı, bir səhmin nominal dəyəri 2 manatdır. Satışa ümumi nominal dəyəri 1 734 618 manat olan 867 309 səhm çıxarılıb. Səhmdar cəmiyyətinin digər müəssisələrdə iştirak payı və qeyri-maddi aktivləri yoxdur. Müəssisə layihə üzrə ildə 1,5 mln. ədəd şin istehsal etmək gücünə malikdir. Səhmdar cəmiyyətinin cəmi öhdəlikləri 5 658 585,29 manat, o cümlədən əməkhaqqı və ona bərabər borclar 201 734 manat, mal, iş və xidmətlərə görə borclar 5 456 851,29 manat, debitor borcları isə 2 452 270,01 manatdır.
İddiaçıların təqdim edəcəyi İnvestisiya Proqramında müasir standartlara cavab verən rezin təkər və rezin məmulatları, eləcə də xalq istehlakı mallarının istehsalı, saxlanması və satışı üçün həyata keçiriləcək istehsal profili, yeni texnologiyaların tətbiqi, məhsulun çeşidi və s. əksini tapmalıdır.
İddiaçılar səhmdar cəmiyyətinin Özəlləşdirmə Planı ilə tanış olmaq və investisiya müsabiqəsi haqqında əlavə məlumat əldə etmək üçün 2009-cu ilin yanvarın 7-dək DƏİEDK-yə müraciət edə bilərlər. İddiaçıların ərizə və təkliflərinin qəbulu həmin gün başa çatacaq. Müsabiqə Komissiyası tərəfindən müsabiqə təkliflərinin qiymətləndirilməsi isə yanvarın 9-da həyata keçiriləcək.