Sənaye və energetika

Xarici şirkət Azərbaycanda elektrik stansiyası alıb

18 dekabr 2008 12:26 (UTC +04:00)

Bakı. Rəşad Süleymanov – APA-Economics. Azərbaycan Dövlət Əmlakının İdarə Edilməsi üzrə Dövlət Komitəsi (DƏİEDK) tərəfindən «Çiçəkli Su Elektrik Stansiyası» ASC-nin səhmlərinin satışı üzrə investisiya müsabiqəsində «Inter Energy» MMC qalib gəlib. Bu barədə «APA-Economics»ə DƏİEDK-dən məlumat verilib.
Belə ki, «İnter Enerji» MMC-nin təqdim etdiyi İnvestisiya Proqramına əsasən, şirkət iki il ərzində «Çiçəkli» SES-in fəaliyyətinin bərpası və yenidən qurulmasına 4,28 mln. manat investisiya qoyulmasını öhdəsinə götürüb. Nəzərdə tutulan investisiyalar müəssisənin fəaliyyətinin bərpa edilməsi və yenidən qurulması istiqamətində SES-də su qəbuledici qurğuların derivasiya kanalının, müxtəlif hidrotexniki avadanlıqların və təzyiq borusunun, habelə SES-dən suyu ötürən kanalın əsaslı təmir olunması və bərpasına, eləcə də SES-in hidroturbininin, elektrik, idarəetmə avadanlıqlarının alınması, quraşdırılması və sazlanması işlərinə yönəldiləcək. İnvestisiya Proqramının yerinə yetirilməsi nəticəsində elektrik stansiyasının layihə üzrə 2,76 MVt illik istehsal gücü ilə işləməsi nəzərdə tutulub.
Müsabiqənin digər şərtlərinə uyğun olaraq, «Inter Energy» şirkəti 100 min manat məbləğində vəsaitin dövlət büdcəsinə köçürülməsini, silinmək üçün 4 min dövlət özəlləşdirmə çeki və eyni sayda dövlət özəlləşdirmə opsionunun təqdim edilməsini öhdəsinə götürüb.
İnvestisiya Proqramına əsasən müəssisənin gələcək fəaliyyəti təmin edildikdən sonra orada iş yerlərinin bərpası və işçilərin sosial təminatının daha da yaxşılaşdırılması məsələləri də həllini tapacaq.
DƏİEDK «Inter Energy» MMC-nin hansı ölkəyə məxsus olduğunu açıqlamır.