Sənaye və energetika

Ana səhifə

«Gulf Drilling Company Azerbaijan» şirkəti Gürcüstanda neft quyularının qazılması üçün sifariş alıb

23 dekabr 2008 14:10 (UTC +04:00)

Bakı. Nicat Mustafayev – APA-Economics. Birləşmiş Ərəb Əmirliklərinin «Gulf Drilling Supply Fze» servis şirkətinin Azərbaycandakı törəmə müəssisəsi olan «Gulf Drilling Company Azerbaijan» bu ilin sonunadək «Surakhani Oil» Əməliyyat Şirkətinin sifarişi ilə üç neft quyusu qazacaq. «APA-Economics»in məlumatına görə, bunu «Gulf Drilling Company Azerbaijan» şirkətinin direktoru İlham Babayev bildirib.
«Quyuların qazılmasında Çindən aldığımız yeni «ZJ-30» qurğusundan istifadə olunacaq ki, qurğu 3 min metr qazma dərinliyinə malikdir. Artıq bu ilin sonunadək qazma işlərinə başlanılacaq. Quyuların dərinliyi 2,2-2,5 min metr təşkil edəcək və qazıma üç ay ərzində başa çatdırılacaq», - deyə İ.Babayev bildirib.
İ.Babayev onu da qeyd edib ki, «Gulf Drilling Company Azerbaijan» «Azqerneft» müştərək müəssisəsinin sifarişi ilə 2 quyu qazacaq. Quyunun biri gələn il ərzində qazılacaq ki, dərinliyi 2,3 min metr təşkil edəcək.
«Gələn il ərzində biz həmçinin «Qaraçuxur» yatağında qazma işləri aparacağıq. Bizim şirkət həmçinin Gürcüstandan da sifariş alıb. Lakin orada 2-3 quyunun qazılması bizim üçün sərf etməz. Gürcüstan tərəfi sərfəli təkliflə çıxış etsə, qazma işlərini orada aparmağa hazırıq», - deyə İ.Babayev vurğulayıb.
Qeyd edək ki, «Gulf Drilling Company Azerbaijan» şirkəti 2007-ci ilin sonunda fəaliyyətə başlayıb ki, şirkət neft-qaz quyularının qazılması, quyularının əsaslı təmiri, neft-qaz hasilatının artırılmasında yeni texnologiyaların tətbiqi üzrə ixtisaslaşıb. Şirkətin əsas məqsədi neft sənayesində dünyanın qabaqcıl texnikası və texnologiyasının əldə etməklə öz maddi-texniki bazasının möhkəmləndirilməsi və ixtisaslı kadr potensialı hesabına dünya neft-qaz sənayesində qabaqcıl, rəqabət qabiliyyətli şirkətlərdən birinə çevrilməkdir.
Şirkətin Azərbaycanda, Xəzər ətrafı bölgədə və MDB-də uzun müddətli fəaliyyət proqramı hazırlanıb ki, bu proqrama uyğun olaraq şirkətin Bakı ofisinin gələcəkdə Xəzər ətrafı bölgədə və MDB məkanında regional ofisə çevrilməsi nəzərdə tutulur.
Xatırladaq ki, «Qaraçuxur» yatağının işlənməsinə dair saziş 2004-cü ilin iyununda ARDNŞ-la Çinin «Noble Sky» şirkəti arasında imzalanıb. Müqaviləyə əsasən, ARDNŞ-in iştirakı payı 25%, «Noble Sky»ın payı isə 75% təşkil edir. Yataq Bakının 15 km-də yerləşir və 1928-ci ildən işlənir. İstismara başlandıqdan sonra yataqda 36 mln. ton neft hasil olunub. Yatağın istismar fondu 121 quyudan ibarətdir ki, bunun da 45-i işçi vəziyyətindədir. Yatağın qalıq ehtiyatları 5,645 mln. ton neft təşkil edir. Quyuların sulanması 97,9% təşkil edir.
Qeyd edək ki, «Suraxanı» yatağının işlənməsinə dair PSA tipli saziş 2005-ci ilin avqust ayının 16-da ARDNŞ-la «Rafi Oil» şirkəti (BƏƏ) arasında imzalanıb. Sayca 26-cı PSA sazişi olan bu müqavilədə «Rafi Oil» şirkətinin iştirakı payı 75%, ARDNŞ-in payı isə 25% təşkil edir. Müqavilə 25 il müddətində icra olunacaq. Bu müddətin ilk iki ili ərzində «Rafi Oil» şirkəti «Suraxanı» yatağında neft hasilatını 1,5 dəfə artırmalıdır. Hasil edilən səmt qazı isə tam həcmdə təmənnasız olaraq Azərbaycan tərəfinə veriləcək. Xarici investor tərəfindən öhdəliklər yerinə yetirilməyəcəyi təqdirdə ARDNŞ müqaviləni pozmaq hüququna malikdir.
Xatırladaq ki, «Suraxanı» yatağı 1904-cü ildən işlənilir və hasilatın ən yüksək səviyyəsi 1931-ci ildə (4,187 mln. ton) əldə olunub. Müqavilə sahəsi 13 kv. km təşkil edən bu yataqda indiyədək 2 503 quyu qazılıb. Yatağın qalıq ehtiyatları 6,822 mln. ton neft həcmində qiymətləndirilir. Bütün istismar dövrü ərzində «Suraxanı» yatağından 114,5 mln. ton neft və 10 mlrd. kubmetrdən artıq qaz hasil olunub. Layihənin icrasının birinci mərhələsində sərmayə qoyuluşu 100 mln. dollar təşkil edib və gələcəkdə bu göstəricinin 400 mln. dollara çatacağı gözlənilir.