Sənaye və energetika

Dünya bazarında neftin ucuzlaşması Azərbaycan Dövlət Neft Şirkətinin bəzi investisiya layihələrinə mənfi təsir göstərib

23 dekabr 2008 14:59 (UTC +04:00)

Bakı. Ramil Məmmədli – APA. Dünya bazarında neftin ucuzlaşması nəticəsində Azərbaycan Respublikası Dövlət Neft Şirkətinin (ARDNŞ) bir sıra investisiya layihəsi müəyyən dövrədək təxirə salınıb. APA-nın məlumatına görə, bunu ARDNŞ-in prezidenti Rövnəq Abdullayev bildirib: «Neftin qiymətinin düşməsi müəyyən investisiya layihələrinin həyata keçməsinin tarixinə təsir edir. Biz bütün variantları nəzərdən keçirir, təhlillər aparır, hansı işləri həyata keçirəcəyimizi götür-qoy edirik».
R.Abdullayev onu da qeyd edib ki, maliyyə böhranı və neftin qiymətinin aşağı düşməsi ARDNŞ-in Türkiyədə aldığı «Petkim» neft-kimya kompleksinin yenidən qurulması layihəsinin icrasının gedişinə təsir göstərməyib. «Petkim»in gəlirlə işləyən bir müəssisə olduğunu deyən ARDNŞ prezidenti müəssisədə işlərin nəzərdə tutulan qrafik üzrə həyata keçiriləcəyini vurğulayıb.