Sənaye və energetika

Azərbaycanın aparıcı poladəritmə müəssisəsi «Baku Steel Company» istehsalı dayandırıb

06 yanvar 2009 10:43 (UTC +04:00)

Şirkətin mətbuat xidmətinin rəhbəri Namiq Əhmədovun «APA-Economics»ə verdiyi məlumata görə, zavodun 1 000-dən artıq işçisi könüllü olaraq məzuniyyətə çıxıb ki, bu da istehsalın dayandırılması ilə bağlıdır: «Hazırda zavodda istehsal dayandırılıb və bu, müəssisənin metal qırıntılarını istehsal prosesi üçün tələb olunan həcmdə ala bilməməsi ilə bağlıdır».
N.Əhmədov bildirib ki, metal qırıntılarını satan şəxslər «Baku Steel Company» şirkətinin təklif etdiyi alış qiymətindən narazıdır. Belə ki, əgər əvvəl zavod metal qırıntılarının 1 tonunu təxminən 200 manata alırdısa, hazırda bu qiymət 115 manata endirilib: «Qiymətin aşağı salınması şirkətin armaturun satış qiymətinin düşməsi ilə bağlıdır. Əvvəl biz armaturun 1 tonunu təxminən 1 100 manata satırdıq, sonradan armaturun satış qiyməti 620 manata saldıq. Bu da əsasən dünyada müşahidə olunan maliyyə böhranı ilə əlaqədardır. Belə ki, Rusiya və Ukraynadan gətirilən armaturun qiyməti kəskin azalıb».
Bundan başqa, N.Əhmədov qeyd edib ki, zavodun işçiləri təxminən 30-35 günlük məzuniyyətə çıxıb və məzuniyyət ödənişlidir.
Zavodda istehsalın bərpa edilməsinə gəldikdə isə N.Əhmədov bildirib ki, istehsalat təxminən bir aydan sonra bərpa olunacaq.
Qeyd edək ki, ötən ilin noyabr ayında zavodun fasiləsiz tökmə sexində təmir işləri ilə əlaqədar olaraq müəssisədə çalışan işçilər ödənişli məzuniyyətə çıxarılıb. Dekabr ayında (sexin təmirindən sonra) bütün işçilər yenidən işə qaytarılıb.
Xatırladaq ki, zavodda ümumilikdə 1 700-dən artıq işçi çalışır.
Qeyd edək ki, «Baku Steel Company» şirkəti 2001-ci ildən fəaliyyət göstərir. Zavodda bir adda (tikinti armaturu) müxtəlif çeşiddə məhsul istehsal olunur.