Sənaye və energetika

Ana səhifə

Bu ilin I rübündə Bakı-Ceyhan kəməri ilə 8,7 mln. ton neft ixrac olunub

08 may 2009 10:49 (UTC +04:00)

Bakı. Nicat Mustafayev – APA-Economics. «BP-Azerbaijan» şirkəti 2009-cu ilin I rübündə Bakı-Tiflis-Ceyhan (BTC) boru kəməri vasitəsi ilə 8,7 mln. ton (65 mln. barel) neft ixrac edib.

«BP-Azerbaijan» şirkətindən «APA-Economics»ə verilən məlumata görə, 2008-ci il ərzində BTC ilə ixrac edilmiş neft və kondensat həcmi təxminən 32,9 mln. ton (245,6 mln. barel) təşkil edib.

Şirkətdən həmçinin qeyd olunub ki, 2006-cı ildə BTC ixrac əməliyyatlarına başlanmasından sonra boru kəmərinin məhsuldarlığı qurğular və nasos stansiyaları istismara verildikcə sabit şəkildə artmaqla 2008-ci ilin ortalarında gündə 1 mln. barelə çatıb və 2009-cu ilin mart ayında «BP-Azerbaijan» şirkəti BTC-nin gündəlik ötürücülük gücünü 1,2 mln. barelədək artırmaq layihəsini başa çatdırıb.

Bundan başqa, 2006-cı ilin iyun ayının 4-də ilk tankerin Ceyhanda yüklənməsindən bu günədək BTC vasitəsilə nəql edilmiş təxminən 600 mln. barel (80 mln. ton) xam neft Ceyhanda 760 tankerə yüklənilib və dünya bazarlarına göndərilib.

Qeyd edək ki, BTC kəməri 2006-cı ilin iyul ayında rəsmən istifadəyə verilib. Kəmərin uzunluğu 1 768 km (443 km Azərbaycan, 248 km Gürcüstan, 1 077 km isə Türkiyə ərazisindən keçir), illik nəqletmə gücü isə 50 mln. ton təşkil edir.

BTC-nin əsas səhmdarları rolunda BP (30,1%), «AzBTC» (25%), «Chevron» (8,90%), «StatoilHydro» (8,71%), TPAO (6,53%), ENI (5%), «Total» (5%), «Itochu» (3,40%), INPEX (2,50%), «ConocoPhillips» (2,50%) və «Hess» (2,36%) şirkətləri çıxış edir.