Sənaye və energetika

Ana səhifə

Xəzər Dəniz Neft Donanmasının nəql barjı və yedək gəmisi Rusiyanın «LUKoil» şirkətinin sifarişini yerinə yetirəcək

25 iyun 2009 08:21 (UTC +04:00)

Bakı. Rəşad Süleymanov – APA-Economics. ARDNŞ-in Xəzər Dəniz Neft Donanmasının özüboşaldan nəql barjı (STB-1) və onu daşıyan «Nefteqaz-58» yedək gəmisi Rusiyanın «LUKoil» şirkəti tərəfindən istifadə olunacaq. Bu barədə «APA-Economics»ə ARDNŞ-dan məlumat verilib.

İyunun 24-də barj «Nefteqaz-58» gəmisinin köməkliyi ilə Həştərxana yola salınıb. Orada isə yeni inşa edilmiş neft platformasını göyərtəsinə alan STB-1 onu Xəzər dənizinin şimalında «LUKoil»un işlədiyi yataqlara aparacaq.

Yaxın vaxtlarda 2500 tonluq yükgötürmə qabiliyyətinə malik, ən müasir svayvurma avadanlığı ilə təchiz edilmiş «Azərbaycan» kran gəmisinin də «Andoqa» yedək gəmisi vasitəsilə həmin əraziyə aparılması gözlənilir. «Azərbaycan» gəmisi orada svayların vurulmasını və platformanın dənizin dibinə bərkidilməsi üçün sementləmə işlərini həyata keçirəcək. Müqavilənin müddəti 40 gündür.

Qeyd edək ki, STB-1 barjının yükgötürmə qabiliyyəti 18 min ton, uzunluğu 163 metr, eni 45,5 metrdir. Barjın dartıcı qurğularla təchiz olunmuş hidravlik sistemi əlavə kranlar tələb olunmadan ən böyük və ağır yükləri göyərtəyə qaldırmağa və boşaltmağa imkan verir. Azərbaycana 1983-cü ildə gətirilmiş STB-1 barjı tikinti bloklarının dənizə aparılması üçün nəzərdə tutulub.