Sənaye və energetika

Ana səhifə

«Azəriqaz» QSC-nin strukturunda və idarəetmə sistemində dəyişikliklər aparılacaq

03 iyul 2009 09:13 (UTC +04:00)

Bakı. Rəşad Süleymanov – APA-Economics. Azərbaycan Dövlət Neft Şirkətinin (ARDNŞ) tərkibinə daxil edilmiş «Azəriqaz» QSC-nin strukturunda və idarəetmə sistemində dəyişikliklərin aparılması planlaşdırılır. «APA-Economics»in məlumatına görə, bunu ARDNŞ prezidenti Rövnəq Abdullayev bildirib.

«Prezidentin fərmanına uyğun olaraq, bir ay ərzində yeni struktur hazırlanacaq. Paralellik aradan götürüləcək və idarəetmədə yeniliklər ediləcək», - deyə R.Abdullayev vurğulayıb.

ARDNŞ prezidentinin sözlərinə görə, «Azəriqaz» işlək struktur olduğundan sistem və işçiləri saxlanılacaq.

R.Abdullayev ARDNŞ-in Azərbaycanın qaz təsərrüfatında təchizat və xidmət səviyyəsinin yüksəldilməsi məqsədi ilə tədbirlər həyata keçirəcəyini də vurğulayıb: «Qaz sistemində keyfiyyəti yüksəltməyə «Azəriqaz»ın imkanları olmayıb. Çalışacağıq ki, yeni proqramla rayon və kəndləri maksimum qazlaşdıraq və dünyada maksimum qazlaşma Azərbaycanda olsun».

ARDNŞ prezidenti yığım səviyyəsinin artacağına ümid edir: «Biz qapı-qapı düşüb pul yığmayacağıq. Elə bir şərait, elə bir xidmət göstərəcəyik ki, əhali gətirib qazın pulunu özü vaxtında ödəsin».

R.Abdullayevin sözlərinə görə, ARDNŞ «Azəriqaz»a qazı subsidiya ilə verib. Belə ki, şirkət «Şahdəniz»dən qazın hər 1000 kubmetrini 58 manata aldığı halda, «Azəriqaz»a 42 manata satıb.

Əhaliyə satılan qazın qiymətinin artırılmasına gəlincə, R.Abdullayev bu artımın əsaslandırıldığını qeyd edib. ARDNŞ prezidenti bildirib ki, xərclər azaldılarsa, əhaliyə satılan qazın qiymətinə yenidən baxılması mümkündür.

«Azərenerji»yə satılan qazın qiyməti elektrik enerjisinin qiymətinə təsir etdiyindən buna gələcəkdə baxıla bilər.

Qeyd edək ki, Tarif Şurasının qərarı ilə iyulun 1-dən əhali istehlakçı qrupuna satılan qazın hər 1000 kubmetrinin qiyməti 47,2 manatdan 100,0 manata artırılıb.