Sənaye və energetika

Ana səhifə

«Nabucco» layihəsi üzrə imzalanma mərasiminə 18 ölkənin dövlət və hökumət rəsmiləri qatılacaq

09 iyul 2009 14:04 (UTC +04:00)

Bakı. Rəşad Süleymanov – APA-Economics. İyulun 13-də Ankarada «Nabucco» layihəsi üzrə imzalanma mərasiminə 18 ölkənin dövlət və hökumət rəsmiləri qatılacaq. Bu barədə «APA-Economics» Türkiyənin ANKA agentliyinə istinadən məlumat verib.

Türkiyə ilə birlikdə sazişə imza atacaq Macarıstan, Avstriya və Bolqarıstanı mərasimdə baş nazirlər, Rumıniyanı isə prezident təmsil edəcəyi dəqiqləşib. Tədbirdə iştirakla bağlı region dövlətlərindən yalnız İrana dəvət göndərilməyib.

Tədbirdə Azərbaycan, Türkmənistan, Qazaxıstan, Özbəkistan, İraq və Misirdən də dövlət və hökumət rəsmiləri iştirak edəcəklər. Tədbirdə ABŞ-ı Avrasiya enerji məsələləri üzrə xüsusi nümayəndə Riçard Morninqstar, Gürcüstanı isə dövlət başçısı Mixail Saakaşvili təmsil edəcək.

Xatırladaq ki, mərasimdə iştirak etmək üçün Azərbaycan tərəfinə də rəsmi dəvət göndərilib. Lakin tədbirdə rəsmi Bakını kimin təmsil edəcəyi hələ dəqiqləşməyib.

Qeyd edək ki, Xəzər regionundan Türkiyə və Balkan yarımadası vasitəsilə Mərkəzi Avropaya təbii qazın ixracı üçün nəzərdə tutulan «Nabucco» kəmərinin inşası məqsədilə yaradılan «Nabucco Gas Pipeline İnternational GmbH.» konsorsiumuna OMV (Avstriya), MOL (Macarıstan), «Transgaz» (Rumıniya), «Bulgargaz» (Bolqarıstan), «BOTAŞ» (Türkiyə) və RWE (Almaniya) şirkətləri qoşulub. Hər bir tərəfdaş şirkətin konsorsiumda payı 16,67% təşkil edir. Layihənin xərclərinin 1/3-i səhmdarlar tərəfindən, qalan hissəsi isə maliyyə-kredit təşkilatları tərəfindən maliyyələşdiriləcək. Bu yaxınlarda layihənin ümumi investisiya dəyəri 4,6 mlrd. avrodan 7,9 mlrd. avroyadək (12,3 mlrd. ABŞ dolları) artırılıb.

İtaliya bəstəkarı Cüzeppe Verdinin 1842-ci ildə yazdığı operanın personajı Babil kralının adı ilə adlandırılan boru xəttinin uzunluğu 3 300 km olacaq, illik nəqletmə gücü isə 31 mlrd. kubmetr həcmində nəzərdə tutulub. Layihə çərçivəsində ilk qazın artıq 2013-cü ildən sonra Avropaya çatdırılması planlaşdırılır