Sənaye və energetika

Ana səhifə

Azərbaycan Prezidenti: “Tranzit məsələlərinin həll olunmaması “Nabukko” layihəsinin həyata keçirilməsində əsas maneədir”

15 noyabr 2009 11:28 (UTC +04:00)

APA-nın “Azərtac” Dövlət Agentliyinə istinadən verdiyi xəbərə görə, bunu Bolqarıstana səfəri zamanı bu ölkənin prezidenti Georgi Pırvanovla birgə keçirdiyi mətbuat konfransında Azərbaycan prezidenti İlham Əliyev deyib.
Prezident qeyd edib ki, enerji təhlükəsizliyi məsələləri son illər ərzində dünya gündəliyinin ən önəmli yerlərinə çıxıb: “Azərbaycan öz tərəfindən enerji təhlükəsizliyi və enerji daşıyıcılarının nəqlinin şaxələndirilməsi məsələlərinin həlli işinə töhfəsini verir. Əminəm ki, bu gün imzalanmış sənədlər “Cənub dəhlizi”nin təşkil edilməsində öz müsbət rolunu oynayacaq”.

Prezident Bolqarıstanla Azərbaycan arasında qaz sahəsində əməkdaşlığın çox uğurlu olacağına əminliyini vurğulayıb: “Bu əməkdaşlıq gələcəkdə genişlənəcək və başqa ölkələri həmin müsbət təşəbbüsə cəlb edəcək. Azərbaycan qazının Bolqarıstana çatdırılması nəticəsində Azərbaycan Avropa İttifaqının qaz sahəsində tərəfdaşına çevriləcək. Əminəm ki, bu, Avropa İttifaqı üçün də, bizim üçün də vacibdir”.

Azərbaycanın qaz ehtiyatlarının çox geniş olduğunu vurğulayan ölkə başçısı “ən minimal hesablamalara görə təsdiq edilmiş ehtiyatlar təxminən 2 trilyon kubmetr ətrafındadır. Əlbəttə, biz istəyirik ki, bu qazı ixrac edək, resurslarımızı əmniyyətli və şaxələndirilmiş yollarla dünya bazarlarına çatdıraq. Hazırda Azərbaycan qazı müxtəlif istiqamətlərlə regional bazarlara çıxarılır və əlbəttə, biz istəyirik ki, tərəfdaşlarımızın sayı çoxalsın. Əminəm ki, Bolqarıstan bu işlərdə, Azərbaycan qazının Avropa qitəsinə idxal edilməsində çox önəmli rolunu oynayacaq”- deyə, bildirib.
İmzalanmış sənədlər əsasında yaxın zamanlarda ikitərəfli işçi qrupu yaradılacağını söyləyən dövlət başçısı işçi qrupundan qısa müddət ərzində təkliflər gözlədiyini də bildirib.
Azərbaycanın “Nabukko” layihəsini həmişə dəstəklədiyini deyən prezident bu dəstəyin davam etdiyini söyləyib: “Bu ilin may ayında Avropa İttifaqı tərəfindən təşkil edilmiş enerji zirvəsində Azərbaycan “Nabukko” layihəsinin həyata keçirilməsinə öz töhfəsini verib və məlum bəyannaməni imzalayıb”.
Prezident deyib ki, “Nabukko” layihəsinin həyata keçirilməsi üçün bir neçə önəmli məsələ öz həllini tapmalıdır: “ İlk növbədə, resurs bazası olmalıdır. Bu da var. Azərbaycanın çox böyük qaz ehtiyatları var. Biz maraqlıyıq ki, öz resurslarımızı müxtəlif yollarla ixrac edək. Digər önəmli məsələ tranzit məsələsinin həll olunmasıdır. Əfsuslar olsun ki, biz bu vaxta qədər bu istiqamətdə irəliyə heç bir addım ata bilməmişik. Tranzit məsələlərinin həll olunmaması əslində, “Nabukko” layihəsinin həyata keçirilməsində əsas maneədir. Üçüncü vacib məsələ layihənin maliyyələşdirilməsidir. Bu istiqamətdə müəyyən addımlar atılıb, ilkin ödənişlər ayrılıb. Ancaq bildiyiniz kimi, “Nabukko” layihəsinin həyata keçirilməsi üçün çox böyük vəsait lazımdır. Hələ ki, o vəsaitin məbləği dəqiqləşdirilir və ən önəmlisi, mənbəyi də dəqiqləşdirilməlidir”.

Ölkə başçısı bildirib ki, digər önəmli məsələlər də öz həllini tapmalıdır: “Mən sadəcə olaraq əsas üç məsələni qeyd etdim. Üç məsələnin ancaq biri hazır vəziyyətdədir - o da Azərbaycanın resurs bazasıdır. Digər məsələlər əfsuslar olsun ki, hələ müzakirə mövzusudur. Ancaq onu da qeyd etməliyəm ki, biz bu məsələyə daha geniş aspektdən yanaşırıq. Biz bu məsələyə “Cənub dəhlizi” layihəsi kimi yanaşırıq. “Cənub dəhlizi” layihəsinin içində, o cümlədən “Nabukko” layihəsi də yer tutur. Bundan başqa, Trans Adriatik Kəməri (TAP) layihəsi, Türkiyə-Yunanıstan-İtaliya (TGİ) layihəsi də - onların hamısı “Cənub dəhlizi” layihəsinin içində olan layihələrdir. Bu gün imzalanmış sənədlər “Cənub layihəsi” adlandırdığımız böyük təşəbbüsün həyata keçirilməsində çox önəmli rol oynaya bilər. Çünki bu sənədlərdə iki tərəf iştirak edir. Bolqarıstan və Azərbaycan – iki dost ölkə, əminəm ki, imzalanmış sənədlərin yaxın zamanlarda həyata keçirilməsi üçün nə lazımdırsa onu da edəcəkdir”.