Sənaye və energetika

Ana səhifə

«BP-Azerbaijan» bu il Bakı-Ceyhan boru kəmərinə 60 mln. dollar məbləğində əsaslı xərc çəkib

20 noyabr 2009 14:02 (UTC +04:00)

Bakı. Nicat Mustafayev – APA-Economics. Bu ilin ilk üç rübü ərzində «BP-Azerbaijan» şirkəti Bakı-Tbilisi-Ceyhan (BTC) əsas ixrac boru kəməri üzrə 59 mln. ABŞ dolları məbləğində əsaslı xərc çəkib.

Şirkətdən «APA-Economics»ə verilən məlumata görə, 2009-cu ildə BTC üzrə əsaslı xərclər 143 mln. dollar məbləğində planlaşdırılıb ki, cari ilin yanvar-sentyabr ayları ərzində bu məbləğdən 59 mln. dolları xərclənib.

Şirkəçtdən həmçinin bildirilib ki, 2006-cı ilin iyun ayının 4-də ilk tankerin Ceyhan limanından yola salınmasından 2009-cu ilin III rübünün sonunadək BTC vasitəsilə nəql edilmiş təxminən 729 mln. bareldən artıq (97,7 mln. ton) xam neft Ceyhanda 918 tankerə yüklənib və dünya bazarlarına göndərilib: «Cari il noyabr ayının 9-dək isə BTC ilə ixrac edilmiş 758,6 mln. barel (101,5 mln. ton) xam neft 959 tankerə yüklənərək dünya bazarlarına yola salınıb».

Qeyd edək ki, BTC-nin səhmdarları sırasına «BP-Azerbaijan» (30,1%), AzBTC (25%), «Chevron» (8,9%), «Statoil» (8,71%), TPAO (6,53%), ENİ (5%), «Total» (5%), «İtoçu» (3,4%), İNPEKS (2,5%), «KonokoFillips» (2,5%) və «Hess» (2,36%) şirkətləri daxildir.