Sənaye və energetika

Ana səhifə

Yaxın 4 ildə Azərbaycanda qaz hasilatının 30 mlrd. kubmetrə çatacağı gözlənilir

19 sentyabr 2011 10:41 (UTC +04:00)

«APA-Economics»in Yeni Azərbaycan Partiyasının veb-saytına istinadən verdiyi məlumata görə, bunu Azərbaycan Dövlət neft Şirkətinin prezidenti Rövnəq Abdullayev bildirib.

Onun sözlərinə görə, uzun fasilədən sonra «Ümid» perspektivli strukturunda daxili resurslar hesabına başlanmış kəşfiyyat işləri ötən il böyük müvəffəqiyyətlə nəticələnib. İlkin hesablamalara görə, yatağın çıxarıla bilən ehtiyatları 200 mlrd. kubmetr qaz, 40 mln. ton kondensat həcmində qiymətləndirilir. Hazırda yatağın ehtiyatlarının dəqiqləşdirilməsi məqsədi ilə qazılan ikinci quyuda işlər uğurla davam etdirilir. Azərbaycanın dövlət müstəqilliyini bərpa etdikdən sonra kəşf edilmiş ilk yataq olaraq «Ümid»də alınan nəticələr həm də Xəzərin Azərbaycan sektorunda məhsuldarlıq perspektivlərini yüksəldib, yeni lay və yataqların açılması ehtimalını artırıb. Artıq «Babək» strukturunun ehtiyatları 400 mlrd. kubmetr qaz, 80 mln. ton kondensat həcmində qiymətləndirilir. Eyni zamanda mütəxəssislərin ilkin hesablamalarına görə, «Abşeron» yatağında 350 mlrd. kubmetr qaz və 45 mln. ton kondensat həcmində karbohidrogen ehtiyatlarının olduğu ehtimal edilir.

R.Abdullayev bildirib ki, qarşıdakı dövrdə Almaniyanın «RWE» şirkəti ilə «Naxçıvan» perspektiv strukturunda kəşfiyyat işlərinə başlanılması da nəzərdə tutulur. Bu strukturda 300 mlrd. kubmetr qaz, 40 mln. ton kondensat ehtiyatı olması gözlənilir. «Azəri-Çıraq-Günəşli» yataqlar blokunun dərinlikdə yerləşən qaz ehtiyatlarının işlənilməsi məsələsi də baxılma mərhələsindədir. İlkin qiymətləndirmələrə əsasən, burada da qaz ehtiyatları 300 mlrd. kubmetr civarındadır.

ARDNŞ başçısı qeyd edib ki, həyata keçirilən layihə və proqramlar üzrə görülən işlər, eləcə də perspektiv strukturların potensialı nikbin proqnozlar üçün əsas verir ki, 2015-ci ildə ölkə üzrə neft hasilatının 50-55 mln. tona, qaz hasilatının isə 30 mlrd. kubmetrə çatdırılacağı nəzərdə tutulur: «Avropanın enerji istehlakının 2020-ci ilədək 70%-nin, 2030-cu ilədək isə 85%-dək hissəsinin idxal hesabına təmin ediləcəyi barədə ekspert rəyləri fonunda bu, xüsusən böyük əhəmiyyət kəsb edir».