Sənaye və energetika

Ana səhifə

Yaxın 10 ildə Azərbaycanda enerji istehsalının 20%-i alternativ mənbələrin payına düşəcək

19 sentyabr 2011 14:52 (UTC +04:00)

Bu barədə «APA-Economics»ə Sənaye və Energetika Nazirliyi Alternativ və Bərpa Olunan Enerji Mənbələri üzrə Dövlət Agentliyinin direktoru Akim Bədəlov bildirib.

Onun sözlərinə görə, artıq dünyanın aparıcı ölkələrində alternativ enerjidən istifadə ilə bağlı belə hədəflər müəyyənləşdirilib. Avropa İttifaqının ümumi hədəflərinə görə, 2020-ci ilə qədər enerji təminatının 20%-i alternativ mənbələr hesabına təmin olunmalıdır. Bəzi ölkələrdə isə 2020-ci ilədək enerji tələbatının 30-40%-nin, bəziləri isə 2030-cu il üçün tələbatın 100%-nin alternativ mənbələr hesabına ödənilməsini məqsəd qoyub.

Azərbaycanın bu ölkələrdən fərqlənmək istəmədiyini vurğulayan agentlik rəhbərinin sözlərinə görə, ölkəmiz 2020-ci ilədək enerji təminatının 20%-ni alternativ mənbələrdən almaq niyyətindədir: «Fikrimiz var ki, enerjidən istifadənin təqribən 20%-ni alternativ mənbələr hesabına ödəyək. Bu hesabla həmin vaxt bizdə alternativ enerji mənbələri hesabına 2 min MVt enerji istehsal olunacaq».

Qeyd edək ki, su elektrik stansiyaları da nəzərə alınmaqla, Azərbaycanda enerjiyə olan tələbatın 10%-i alternativ enerji mənbələri hesabına ödənilir. «SES-ləri nəzərə almasaq, külək, günəş, bioqaz və tullantılardan alınan enerjinin xüsusi çəkisi 1%-ə də çatmır».

A.Bədəlov vurğulayıb ki, gələcəkdə bəzi yaşayış məntəqələrinin də bütünlüklə alternativ enerji mənbələri hesabına təmin edilməsi nəzərdə tutulur: «Dövlət başçısı qarşımızda Qobustanın tamamilə alternativ enerji mənbələri hesabına təmin olunması barədə tapşırıq qoyub. Bu onu göstərir ki, bu sahədəki planlarımız Avropadan geri qalmır, bəzən isə onları qabaqlayır».

Bununla yanaşı agentlik direktoru bildirib ki, Azərbaycan alternativ enerji mənbələrinin inkişafında Avropanın buraxdığı bəzi səhvləri təkrarlamaq istəmir: «Avropa çox böyük tariflərdən və çox böyük subsidiyalardan istifadə edib. Texnologiyaların qiymətlərinin həddən artıq baha olması və digər məsələlər Avropada öz təsirini göstərib. Biz istəməzdik ki, onların keçdiyi eyni yolu keçək». Belə ki, A.Bədəlovun sözlərinə görə, başqa ölkələrdən fərqli olaraq Azərbaycan alternativ enerji mənbələri hesabına alınan enerjinin adi formaya nisbətən ucuz olması nəzərdə tutulub.