Sənaye və energetika

Ana səhifə

Gələn il Azərbaycanda iki yeni qazma qurğusunun inşasına başlanacaq

21 sentyabr 2011 08:43 (UTC +04:00)

Bakı. Nicat Mustafayev – APA-Economics. Azərbaycanda yerləşən neft və qaz strukturlarında qazma işlərinin aparılması üçün müvafiq qazma qurğularının çatışmazlığı problemi yaranıb. «APA-Economics»in məlumatına görə, bunu Azərbaycan Dövlət Neft Şirkətinin (ARDNŞ) prezidenti Rövnəq Abdullayev bildirib.

R.Abdullayev qeyd edib ki, artıq 2012-ci ildə Azərbaycanda iki yeni qazma qurğusunun tikintisinə start veriləcək: «Bizim üzən qazma qurğularının çatışmazlığı problemimiz var. Bu problemi aradan qaldırmaq üçün ARDNŞ, «Total» və BP şirkətləri gələn ildən iki qurğunun tikintisinə başlayacaq. Tikintini Dövlət Neft Şirkətinin «Caspian Drilling Company» şirkəti yerinə yetirəcək. «Total», ARDNŞ və BP isə quyuların qazılmasına zəmanət verəcək».

ARDNŞ prezidenti vurğulayıb ki, layihənin həyata keçirilməsi ilə bağlı tələb olunan maliyyə vəsaitlərinin təmin olunması ilə bağlı problem yaranmayacaq: «Maliyyənin cəlb edilməsində problem olmayacaq. Hər üç şirkət sifarişçidir. Qurğulara ən böyük tələbat isə ARDNŞ-da yaranıb».