Sənaye və energetika

Ana səhifə

Bakıda Enerji Tənzimləyicilərinin Regional Assosiasiyasının illik iclası keçirilir - YENİLƏNİB

Bakıda Enerji Tənzimləyicilərinin Regional Assosiasiyasının illik iclası keçirilir - <font color=red>YENİLƏNİB</font>

22 sentyabr 2011 11:25 (UTC +04:00)

Bakı. Sevil Zeynalqızı - APA-Economics. Bu gün Bakıda Enerji Tənzimləyicilərinin Regional Assosiasiyasının (ERRA) Sədrlər Toplantısı və Qiymətəmələgəlmə Tarifləri üzrə Komitəsinin ilik iclası işə başlayıb. APA-nın məlumatına görə, tədbirdə çıxış edən Azərbaycanın iqtisadi inkişaf naziri Şahin Mustafayev bildirib ki, Azərbaycanın enerji siyasəti regional müstəvidən çıxaraq qlobal müstəviyə daxil olub və artıq ölkə etibarlı tərəfdaş kimi tanınır. Nazir qonaqlara ölkə iqtisadiyyatı, aparılan islahatlar, enerji siyasəti və digər məsələlərlə bağlı ətraflı məlumat verib.

ERRA-nın sədri Qabor Sorenyi çıxışında rəhbərlik etdiyi təşkilatın fəaliyyəti haqqında danışıb. O bildirib ki, ERRA Mərkəzi Avropa, Avrasiya və ABŞ-ın tənzimləyici qurumlarının birliyi kimi 2001-ci ildə yaradılıb. Hazırda təşkilata Şərqi və Qərbi Avropa, Afrikanın 30-a yaxın ölkəsi üzvdür: «Təşkilatın əsas fəaliyyət istiqamətləri üzv ölkələrin tənzimləyici qurumlarının dəstəklənməsi, informasiya və təcrübə mübadiləsinin asanlaşdırılması, elmi tədqiqat və praktiki bilik səviyyələrinin artırılması, tədris və texniki sahələrdə əməkdaşlığın təşviqidir».

Ş.Mustafayev öz növbəsində qeyd edib ki, son 10 ildə Azərbaycanda ümumi daxili məhsulun artım tempi 2,8%-dən çox olub: «Ümumilikdə isə bu artım 4 dəfədən çoxdur. Cənubi Qafqaz regionu iqtisadiyyatının 70%-i Azərbaycanın payına düşür. Son 10 ildə əhalinin gəlirləri 6,3 dəfə artıb, yoxsulluğun səviyyəsi 49%-dən 9,1%-ə enib».

Ş.Mustafayev bildirib ki, üç il əvvəl başlayan qlobal böhran hazırda bir sıra Avropa dövlətlərində hələ də davam edir. Azərbaycanda isə həyata keçirilən iqtisadi siyasət nəticəsində ölkə qlobal maliyyə böhranının təsirindən uğurla çıxa bilib: «Qlobal maliyyə böhranına baxmayaraq, 2009-2010-cu illərdə Azərbaycanın iqtisadi gəlirləri 14%-dən çox olub. Ölkənin valyuta ehtiyatları 40 mlrd. dollar həddini keçib, bu da ölkənin xarici borcunu 4 dəfə üstələyir».

Nazir onu da qeyd edib ki, Azərbaycan neft və qaz ixrac edən ölkədir. Ölkədə əsas üç neft və üç qaz kəməri var ki, bu da region və Avropa ölkələrinin enerji təminatında böyük rol oynayır. Ş.Mustafayev regionda bu sahədə Azərbaycanın təkcə Ermənistanla əlaqələrinin olmadığını qeyd edib. Nazir vurğulayıb ki, bu, Ermənistanın Azərbaycan torpaqlarının 20%-ni işğal etməsi və Dağlıq Qarabağ münaqişəsinin həlli istiqamətində aparılan danışıqlarda qeyri-konstruktiv mövqeyindən əl çəkməməsi ilə bağlıdır.