Sənaye və energetika

Ana səhifə

Əfqan İsayev: Geotermal enerji sahəsində araşdırmalara başlamışıq

22 sentyabr 2025 17:22 (UTC +04:00)

Azərbaycanın strateji yerləşməsi bizə imkan verir ki, Orta Asiyadan Türkiyəyə və Avropa İttifaqına “yaşıl elektronları” ötürən bir körpü rolunu oynayaq.

“APA-Economics” xəbər verir ki, bunu Azərbaycan Beynəxalq İnvestisiya Forumunda panel müzakirəsi zamanı Dövlət Neft Şirkətinin (SOCAR) vitse-prezidenti Əfqan İsayev deyib.

O qeyd edib ki, biz hələ başlanğıcdayıq və qarşıda çoxlu imkanlar mövcuddur:

“Məsələn, biz indi dənizdə (offshore) külək enerjisinin inkişafını nəzərdən keçirməyə başlayırıq. Quruda külək günəş enerjisindən istifadə inkişaf mərhələsindədir. Amma dənizdə potensial hələ toxunulmamış qalıb, bu sahədə çox böyük imkanlar var. Xəzər dənizindəki ərazi sularımızda təxminən 157 giqavatlıq imkan mövcuddur. Bundan əlavə, geotermal enerji hələ istifadə olunmayıb. Biz bəzi tərəfdaşlarla birlikdə araşdırmalara başlamışıq və gələcəkdə elektrik istehsalı, geotermal enerji, eləcə də mərkəzləşdirilmiş istilik üçün daha çox iş görüləcək. Bu sahədə də böyük imkanlar var”.

“Nasoslu hidroakkumulyasiya (pump storage hydro) texnologiyası sahəsində də, xüsusilə azad edilmiş ərazilərimizdə böyük potensial var. Yeni müasir infrastruktur, potensial mikroşəbəkələr, batareya əsaslı enerji saxlama həlləri – hər il bu sahədə yeni texnoloji irəliləyişlər müşahidə olunur”, - deyə Ə.İsayev əlavə edib.