Avropa İttifaqı (Aİ) tərəfindən maliyyələşdirilən Merlər Razılaşması – Şərq Tərəfdaşlığı (CoM East) Naxçıvanda yerli iqlim və enerji fəaliyyəti üzrə ən böyük təşəbbüslərdən birinə qoşulmağı nəzərdən keçirən bələdiyyələr üçün mövcud imkanları haqqında maarifləndirici tədbir təşkil edib.
"APA-Economics" xəbər verir ki, tədbirin əsas məqsədi potensial qoşulmaq istəyən tərəflərə Merlər Razılaşmasına üzvlüyün praktikada nə demək olduğunu aydın şəkildə izah etmək olub. Merlər Razılaşması – Şərq Tərəfdaşlığı komandası təşəbbüs haqqında məlumat və şəhərlər üçün mövcud olan konkret dəstək mexanizmlərini təqdim edib. Bu dəstəyə Dayanıqlı Enerji və İqlim üzrə Fəaliyyət Planlarının hazırlanması üzrə metodiki vasitə, irəliləyişin izlənilməsi üçün alətlər, layihə dəstək xidməti, potensialın artırılması fəaliyyətləri, eləcə də iqlim layihələrinin icrasına yönəlmiş texniki dəstək daxildir.
Tədbiri açılış nitqi ilə başlayan Aİ-nin Azərbaycandakı səfiri Marijana Kujundzic iqlim və enerji sahəsində konkret nəticələrin əldə olunmasında şəhərlərin rolunu vurğulayıb və bələdiyyələri təşəbbüsə qoşulmağa dəvət edib.
Energetika Nazirliyinin Enerji Səmərəliliyi şöbəsinin müdiri Cahid Mikayılov enerji səmərəliliyinin Azərbaycanın davamlı inkişaf gündəliyinin əsas istiqamətlərindən biri olduğunu və bu siyasətin real nəticələrə çevrilməsində yerli səviyyədə atılan addımların mühüm rol oynadığını vurğulayıb.
Təşəbbüsün komanda rəhbəri Kristof Frerinq bildirib ki, Azərbaycanda Merlər Razılaşmasına maraq artmaqdadır:
"Merlər Razılaşması çərçivəsində həyata keçirilən tədbirlərin əsas məqsədi şəhərləri məlumatlı qərar qəbul etmək üçün zəruri biliklərlə təmin etməkdir. Azərbaycandan bu təşəbbüsə marağın artdığını müşahidə edirik. Bizim rolumuz bələdiyyələrın təşəbbüsə qoşulub-qoşulmamaq və bunu hansı şəkildə etmək barədə qərar vermələrı üçün aydın məlumat, praktiki alətlər və real nümunələr təqdim etməkdir".
Qeyd edək ki, Naxçıvandan əvvəl eyni maarifləndirici tədbirlər Bakı və Şəki şəhərlərində təşkil olunub.
Merlər Razılaşması – Şərq Tərəfdaşlığı, Qlobal Merlər Razılaşması ailəsinin tərkib hissəsidir. Bu qlobal təşəbbüs şəhərlərin iqlim liderliyi üzrə dünyanın ən böyük alyansıdır və 13 500-dən çox şəhər və yerli hakimiyyət orqanının öhdəlikləri üzərində qurulub. Bu şəhərlər 6 qitə və 147 ölkəni təmsil edir və ümumilikdə 1,2 milyarddan çox əhalini əhatə edir.
Bizi Telegram-da izləyin
t.me/apa_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
