Hadisə

Ana səhifə

Hadisə

Azərbaycan paytaxtında 5 yaşlı qız uşağını doğma atası və ögey anası tərəfindən öldürüldüyü məlum olub

28 fevral 2011 18:11 (UTC +04:00)

Bakı. Hafiz Heydərov – APA. Bakı şəhər Baş Polis İdarəsi və şəhər Prokurorluğu paytaxtın Suraxanı rayonunda 5 yaşlı övladını qətlə yetirən valideynlərin cinayət işi ilə bağlı rəsmi məlumat yayıb. Bakı şəhər Prokurorluğundan APA-ya daxil olan məlumatda bildirilir ki, Bakı şəhəri, Suraxanı rayonu Bülbülə qəsəbəsi S.Bəhlulzadə küçəsi döngə 13, 9 saylı evdə yaşayan, 2006-cı ildə anadan olmuş Həsənova Sevinc Şahlar qızı baş nahiyəsindən aldığı ağır xəsarətdən fevralın 27-də 3 saylı şəhər Kliniki Xəstəxanasında ölüb.

Suraxanı rayon prokurorluğu və rayon polis idarəsinin əməkdaşları tərəfindən hadisə yerinə baxış keçirilib, məhkəmə tibbi-ekspertinin iştirakı ilə Sevinc Həsənovanın meyitinin xarici müayinəsi aparılıb, ölümün baş verməsi səbəblərinin müəyyən edilməsi üçün meyit Məhkəmə Tibbi Ekspertizasının Patoloji Anatomiya Birliyinin Suraxanı rayon şöbəsinə təqdim edilib. Həmçinin baxış zamanı Sevinc Həsənovanın yatdığı çarpayının üzərində qanabənzər ləkələri olan balış üzlüyü və bir ədəd döşəmə silən taxta aşkar edilərək götürülüb.

Faktla bağlı Suraxanı rayon prokurorluğunda Cinayət Məcəlləsinin 126.3-cü (ehtiyatsızlıqdan zərərçəkmişin ölümünə səbəb olan qəsdən sağlamlığa ağır zərər vurma) maddəsi ilə cinayət işi başlanıb. Aparılmış ilkin araşdırmalar zamanı müəyyən edilib ki, fevral ayının 26-sı axşamüstü Sevinc Həsənovanı analığı Rəbiyyət Osmanova döyüb, saat 22 radələrində isə yatağında onun ağlamasına və sakitləşməməsinə görə atası Şahlar Həsənov əsəbiləşərək 5 yaşlı qızı Sevincin baş nahiyəsindən təpiklə qəsdən bir neçə zərbə vurub. Səhəri gün Sevinc aldığı xəsarətlərdən huşunu itirdiyinə görə onu xəstəxanaya aparıblar. Azyaşlı aldığı xəsarətlərdən xəstəxanada dünyasını dəyişib. Cinayət işi üzrə həyata keçirilmiş təxirəsalınmaz istintaq hərəkətləri və əməliyyat-axtarış tədbirləri nəticəsində 1978-ci ildə anadan olmuş Həsənov Şahlar Cümşüd oğlu və 1976-cı il təvəllüdlü Osmanova Rəbiyyət Osmanovna şübhəli şəxs qismində tutulublar.

Hazırda Suraxanı rayon prokurorluğunda cinayət işinin istintaqı davam etdirilir.