Siyasi

Ana səhifə

Siyasi

Adı Yunus Emre, yolu isə "Feto yolu": CHP-li deputatın AŞPA sərgüzəştləri

26 iyun 2026 00:14 (UTC +04:00)

Avropa Şurası Parlament Assambleyasının (AŞPA) 24 iyunda Azərbaycana dair qəbul etdiyi qətnamə ilə bağlı artıq xeyli yazılıb.

(https://apa.az/siyasi/yeni-qetname-kohne-yanasma-aspa-nin-azerbaycana-qarsi-qerezi-davam-edir-tehlil-976116)

Əlbəttə, AŞPA-nın qəbul etdiyi bu “qətnamə” hüquqi qüvvəyə malik deyil. Aydındır ki, “qətnamə” siyasi xarakter daşıyır, ayrı-ayrı mənbələrə və birtərəfli qiymətləndirmələrə əsaslanır, Azərbaycanın rəsmi mövqeyi, təqdim etdiyi faktlar, hətta açıq mənbələrdəki faktlar belə nəzərə alınmır. Bu “qətnamə” ölkədəki hüquqi, siyasi və regional təhlükəsizlik reallıqlarını əks etdirmədiyi üçün obyektivlik və balans prinsiplərinin qorunmasından çox uzaqdır.

Maraqlı məqam isə “qətnamə”nin AŞPA komitəsində müzakirəsi zamanı baş verənlərdir. Belə ki, Assambleyanın Hüquqi Məsələlər və İnsan Hüquqları Komitəsində belçikalı deputat Kristof Lakrua tərəfindən Azərbaycanla bağlı hazırlanmış hesabat üzrə bu il iyunun 22-də AŞPA-nın Elm, Təhsil və Media Komitəsində başqa bir belçikalı deputat Andries Qriffroy tərəfindən hazırlanmış komitə rəyi müzakirə olunub. Bu rəy üzrə komitədə keçirilən səsvermədə hesabatın lehinə səs verənlər və çıxış edənlər arasında Türkiyə Böyük Millət Məclisinin üzvü Yunus Emre də var.

Kimdir bu Yunus Emre?

Yunus Emre Cümhuriyyət Xalq Partiyasının (CHP) üzvüdür və hazırda Türkiyə Böyük Millət Məclisində İstanbul millət vəkili kimi fəaliyyət göstərir. O, Türkiyənin nümayəndə heyətinin tərkibində AŞPA-nın üzvü, parlamentin Xarici İşlər Komissiyasında çalışan deputatdır.

CHP tarixi və sosial demokratiya haqqında bir neçə kitabın müəllifidir. Amma Yunus Emrenin Azərbaycan və Türkiyə əleyhinə məsələlərdə yadına düşən "sosial demokratlığı” adının “FETÖ-çu” kimi hallanmasına mane olmayıb.

CHP daxilində FETÖ ilə əlaqədə olanların olması barədə ittihamları isə ilk dəfə elə hazırkı partiya sədri Kamal Kılıçdaroğlu özü səsləndirib. Hansı ki Kılıçdaroğlu Yunus Emreye "oğlum" deyirdi və evinin ən əziz adamı hesab edirdi.

Kılıçdaroğlunun "CHP-də FETO-çular var" açıqlamalarından sonra mediada və CHP daxilində FETÖ ilə əlaqələrdə ən çox adı çəkilən şəxs məhz Yunus Emre olub. Türkiyə mediası dəfələrlə vurğulayıb ki, Kılıçdaroğlunun Yunus Emreni “bir vaxtlar öz oğlu kimi qəbul etməsinə” baxmayaraq, bu cür sərt açıqlama verməsi onun əlində faktlar olmasına və “işlərin nə qədər irəlilədiyinə” işarədir.

Xüsusilə, 2022-ci ildə Kılıçdaroğlu ilə birlikdə ABŞ səfərinə gedən Yunus Emrenin 8 saat “yoxa çıxması”, həmin müddətdə qaçaraq Pensilvaniyaya baş çəkməsi barədə mediada və sosial mediada geniş müzakirələr var.

Jurnalist Tamar Tanrıyar isə sosial media hesablarında “Yunus Emre CHP-dəki FETÖ imamıdır” yazıb. Lakin onun və medianın, eyni zamanda CHP-dəki bəzi partiyadaşlarının bu ittihamlarına Yunus Emre heç bir açıqlayıcı, şəffaf izahat verə bilməyib.

2023-cü ilə qədər CHP kuluarlarında Yunus Emreni daha çox hər gün Kamal Kılıçdaroğlunun evinə gedib, ona “çay dəmləyib, səhər yeməyi hazırlayan siyasətçi” kimi sarkazmla təsvir edirdilər. Hətta partiya kuluarlarındakı bu dedi-qodular kifayət qədər ciddi media orqanlarında da müzakirə olunurdu, bu yaxınlığın partiyada ciddi narazılığa səbəb olduğu yazılırdı. Amma gün gəlib dövran döndü, Kılıçdaroğlu partiya sədrliyindən uzaqlaşdırıldı. Ona qarşı ilk çıxanlardan biri məhz Yunus Emre oldu. O, U dönüşü ilə Özgür Özelin ən yaxın komandasında yer aldı. 2026-cı ildə məhkəmənin CHP-nin 2023-cü il qurultayını etibarsız saymasından sonra Yunus Emre Özgür Özel tərəfinin əsas simalarından biri kimi çıxış etdi və məhkəmə qərarını "demokratiyaya müdaxilə" adlandırdı.

Yunus Emre indi Azərbaycan əleyhinə qərəzli danışdığı AŞPA-da təmsil etdiyi Türkiyə əleyhinə də dəfələrlə kampaniyalara qoşulub. Türkiyə mediası onun Türkiyə əleyhinə olan qüvvələrlə işbirliyini və çıxışlarını “Türkiyəni xaricdə hədəfə çıxartmaq” kimi qiymətləndirib, tənqid edib.

Azərbaycan həmişə Türkiyəyə dost, qardaş dəstəyini göstərib. Ən başlıcası isə Azərbaycan bütün beynəlxalq platformalarda həqiqətin yanında olub. Özünün geostrateji maraqları ilə yanaşı, həqiqəti, onun aliliyini qoruyub, prinsipial mövqeyi həmişə beynəlxalq hüquqdan, xalqların qərarlarına hörmətdən və həqiqətdən yana olub.

Buna görə də Azərbaycan bütün dostlardan və tərəfdaşlardan, hətta dost olmayanlardan belə, haqlı olaraq ədalətli yanaşma və həqiqətə, onun aliliyinə hörmət gözləyir.

Onu oğlu adlandıran adamı bir göz qırpımında satan, üzvü olduğu partiyanın təməl düşüncəsinin əleyhinə olan bir terror quruluşunun rəhbəri ilə əlaqədə ittiham olunan deputat Yunus Emredən isə həqiqətin aliliyinə hörmət gözləmək özü də əbəsdir.

Adını daşıdığı Yunus Emre belə deyib:

İçin dışın mundar iken
dost neylesin senin ile...
... dost değilsen dost yolunda
Ar neylesin senin ile!