Bakı. Fərid Mirzəyev – APA. Bu gün Bakıda Heydər Əliyevin xatirəsinə həsr olunmuş “Bakı Ürək Günləri” 4-cü Beynəlxalq Konqresi başlayıb.
APA-nın məlumatına görə, tədbir Azərbaycan Ürək-Damar Cərrahiyyəsi Cəmiyyətinin təşkilatçılığı ilə keçirilir.
Dünyanın aparıcı kardioloq və kardio-cərrahlarının da dəvət olunduğu Konqresdə 450-dən artıq yerli və əcnəbi mütəxəssis iştirak edir.
Beynəlxalq konqresdə kardiologiya və ürək-damar cərrahiyyəsindəki ən mübahisəli problemlərə toxunulacaq, tibbin bu sahəsinin ən son yenilikləri müzakirə ediləcək.
Konqresin rəsmi açılış mərasimi sabah saat 10.00-da Fairmont otelində (Alov Qüllələri) baş tutacaq.
Konqres iştirakçıları bu gün Fəxri xiyabanda Heydər Əliyevin, akademik Zərifə Əliyevanın məzarlarını, Şəhidlər xiyabanını ziyarət ediblər.