Hadisə

Ana səhifə

Hadisə

Daxili İşlər Nazirliyi AXCP üzvü Ülvi Quliyevin saxlanılmasının təfərrüatlarını açıqlayıb

05 oktyabr 2013 13:57 (UTC +04:00)

Bunu APA-ya açıqlamasında Daxili İşlər Nazirliyi mətbuat xidmətinin rəis müavini, polis polkovniki Ehsan Zahidov deyib.

E.Zahidov qeyd edib ki, Sumqayıt şəhər Dövlət Yol Polisi İdarəsinin əməkdaşları oktyabrın 4-də gecə saat 23:50 radələrində bir avtomobilin hərəkətinin və idarə edilməsinin şübhəli olmasını sezərək onu saxlayıblar: «Bəlli olub ki, avtomobilin sürücüsü, vətəndaş Ülvi Quliyev maşını içkili vəziyyətdə idarə edib. Sürücü mövcud qanunvericiliyin tələbinə əsasən tibbi müayinədən keçirilib. Bu zaman onun sərxoş olduğu müəyyənləşib və buna dair müvafiq həkim rəyi də verilib. Ülvi Quliyev sərxoş olduğunu özü də etiraf edib. Bundan sonra onun avtomobili qanunun tələbinə əsasən cərimə meydançasına aparılıb. Özü barədə toplanan materiallar isə baxılması üçün aidiyyəti üzrə Sumqayıt Şəhər Məhkəməsinə göndərilib».

E.Zahidov həmçinin bildirib ki, bu, vətəndaş Ü.Quliyevin ilk qanun pozuntusu deyil: «Araşdırmalar zamanı məlum olub ki, Ülvi Quliyev yol hərəkəti qaydalarını son iki ayda 4 dəfə kobud şəkildə pozub. Buna görə də bəzi KİV-də səslənən iddiaların, onun guya siyasi fəaliyyətinə görə saxlanması barədə yazılanların heç bir əsası yoxdur. Yol polisi qanunun tələblərini pozan avtomobili saxlayanda bu addımı onun sürücüsünün siyasi mənsubiyyətinə nəzərən atmır. Yol polisi sürücünün AXCP üzvü olub-olmadığını gecə saat 23:50-də haradan bilə bilər? Bir də ki, gecə saat 23:50-də də təbliğat-təşviqat aparılırmı? Absurd iddiadır. Xəbərdə adı keçən ikinci şəxsə - Elçin Həsənova gəlincə isə o, Ülvi Quliyevin sərnişini olub. Ülvi Quliyevin sərxoşluğu faktı üzə çıxandan sonra Həsənov Quliyevi müdafiə etmək məqsədilə yol polisi əməkdaşlarını təxribata çəkməyə çalışıb. Amma polis təmkinli davranıb. Onun jurnalist olduğu nəzərə alınaraq xəbərdarlıq edilib».