Bakı. Aynur Əliyeva - APA-Economics. “Azərbaycanda heyvandarlıq sahəsində ən böyük problem yemin məhdud olmasıdır. Ölkədə yem istehsalı yoxdur. Hər şərti heyvana tələb olunan yemin ancaq 30%-i ödənilir”.
Bunu “APA-Economics”ə Kənd Təsərrüfatı Nazirliyində heyvandarlıq məhsullarının istehsalı, emalı, damazlıq işi və otlaqlar şöbəsinin sabiq müdiri, heyvandarlıq sahəsi üzrə mütəxəssis Çingiz Fərəcov bildirib.
Mütəxəssis hesab edir ki, ölkədə mal-qaranın cins tərkibi yaxşılaşdırılmalıdır. Bu baş verməyənə qədər ət və süd istehsalı da aşağı olacaq: “Ona görə də bu sahənin inkişafı üçün ilk növbədə yem istehsalı artırılmalıdır. Yem olmadıqda, heyvandarlıq məhsullarının istehsalında məhdudiyyətlər ortaya çıxacaq” .
Ç.Fərəcov qeyd edib ki, Kənd Təsərrüfatı Nazirliyi Nazirlər Kabineti qarşısında xaşa, raps, soya, siloslu qarğıdalı, siloslu günəbaxan, perqo kimi bitkilərin əkini üçün sahibkarlara subsidiya verilməsi ilə bağlı məsələ qaldırıb: “Bu bitkilər heyvandarlığın inkişafı üçün çox lazımdır, lakin onlar ölkədə əkilmir. Respublikada mal-qara ancaq ot və küləş hesabına saxlanılır. Heyvanlara çox az miqdarda qüvvəli yem verilir”, - deyə Ç.Fərəcov bildirib.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
