Bakı. Musa Əhmədov – APA-Economics. 2014-cü ilin oktyabrın 7-12-də Vaşinqtonda Beynəlxalq Valyuta Fondu (BVF) və Dünya Bankının illik toplantısı keçirilib.
Maliyyə Nazirliyindən “APA-Economics”ə verilən məlumata görə, toplantıda Azərbaycanı maliyyə nazirinin müavini Azər Bayramovun rəhbərlik etdiyi nümayəndə heyəti təmsil edib.
BVF və Dünya Bankına üzv ölkələrin yüksək vəzifəli dövlət və hökumət rəsmiləri, beynəlxalq maliyyə institutları və vətəndaş cəmiyyəti nümayəndələrinin iştirak etdiyi illik toplantıda dünya iqtisadiyyatının cari vəziyyəti, gələcək siyasətin əsas istiqamətləri barədə müzakirələr aparılıb. Qeyd olunub ki, bu il qlobal iqtisadi artım 3.3% təşkil edəcək, növbəti ildə bu göstəricinin 4%-dən aşağı olacağı gözlənilir.
BVF-nin icraçı direktoru Kristin Laqard çıxışında dünyada demoqrafiya, qeyri-bərabərlik, işsizlik və ekologiya ilə bağlı problemlərin daha da kəskinləşməsindən danışıb. O, 2008-ci il dünya maliyyə böhranından sonrakı bərpa prosesinə dəstəyin davam etməli olduğunu, həmçinin fiskal siyasətin mümkün qədər çox iş yerlərinin yaradılması və iqtisadi artıma yönəldilməsinin vacibliyini önə çəkib.
Dünya Bankının prezidenti Cim Yen Kim isə ötən il Dünya Bankı tərəfindən ümumilikdə 60 mlrd. ABŞ dolları həcmində kredit və investisiya yatırıldığını, bunun 40%-nin infrastrukturun maliyyələşdirilməsinə yönəldildiyini qeyd edib. Bununla belə o, inkişaf etməkdə olan ölkələrin infrastrukturla bağlı tələblərinin illik 1-1.5 trilyon ABŞ dolları olduğunu və Dünya Bankının bu məqsədlə ayırdığı vəsaitin çox cüzi olduğunu nəzərə çatdırıb.
İllik Toplantı çərçivəsində maliyyə nazirinin müavini A.Bayramov Azərbaycanı Dünya Bankının Direktorlar Şurasında və BVF-nin Direktorlar Şurasında təmsil edən isveçrəli direktorlar Yorq Friden və Daniel Heller ilə görüşüb. Görüş zamanı BVF və Dünya Bankında fəaliyyət göstərən İsveçrədən olan direktorların ofisində Azərbaycan Respublikasının təmsilçiliyinin genişləndirilməsi, bu beynəlxalq qurumlarla əlaqələrin cari vəziyyəti və gələcək əməkdaşlıq istiqamətləri müzakirə olunmuş, ölkəmizdə müşahidə olunan iqtisadi inkişaf, makroiqtisadi və maliyyə sabitliyi müsbət qiymətləndirilib, son illərdə əldə edilən uğurlar və gələcəkdə görüləcək işlər ətrafında geniş fikir mübadiləsi aparılıb.
A.Bayramov həmçinin İsveçrənin təkrarsığorta şirkəti “Swiss Re”nin vitse- prezidenti Andreas Pristav və icraçı direktor Reto Şnarviller ilə görüşüb. Şirkət rəsmiləri Azərbaycanla əməkdaşlıqda maraqlı olduqlarını ifadə edərək əməkdaşlığın mümkün istiqamətləri barədə geniş təqdimatlar ediblər.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
