Bakı. Şəhriyar Əlizadə - APA. Bu gün Bakı Ağır Cinayətlər Məhkəməsində soyğunçuluq cinayəti törətməkdə təqsirli bilinən Ramin Həsənov və Pünhan Qurbanovun məhkəməsi başa çatıb.
APA-nın məlumatına görə, prosesdə hökm oxunub. Hökmə əsasən, R.Həsənov 7 il, P.Qurbanov 6 il 6 ay müddətinə azadlıqdan məhrum edilib.
Qeyd edək ki, təqsirləndirilən şəxslər bu il yanvarın 11-də Nəsimi rayonu ərazisində 82 nömrəli avtobusda Kürdəmir rayon sakini Ceyhun Ərəbxanovu döyərək, onun mobil telefonunu və pulunu alıblar. R.Həsənov 82 nömrəli avtobusun sürücüsü olub.
Nəsimi Rayon Polis İdarəsinin 20-ci polis bölməsi əməkdaşlarının keçirdiyi əməliyyat tədbirləri nəticəsində cinayətdə təqsirli bilinən Ramin Həsənov və Pünhan Qurbanov həbs edilib.