Sosial

Ana səhifə

Sosial

Azərbaycan ərazisində qeyri-sabit hava şəraiti bir neçə gün davam edəcək

08 avqust 2008 12:58 (UTC +04:00)

Bakı. Rəşad Süleymanov – APA-Economics. Avqust ayının 7-də axşam saatlarından başlayaraq Rusiyanın cənubundan soyuq atmosfer cəbhəsinin Azərbaycan ərazisinə yaxınlaşması ilə əlaqədar hava şəraiti dəyişib. Bu barədə «APA-Economics»ə Ekologiya və Təbii Sərvətlər Nazirliyi Milli Hidrometeorologiya Departamentindən məlumat verilib. Ölkənin şimal-qərb rayonlarında yağan leysan xarakterli yağışlar nəticəsində Balakən-Şəki bölgəsinin Talaçay, Ağçay, Kürmükçay çaylarından qısamüddətli daşqınlar keçib. Ən çox düşən yağıntının miqdarı Qaxda 96 mm, İlisuda 59 mm, Zaqatalada 40 mm (aylıq normanın 54%-i), Şəkidə 26 mm (aylıq normanın 46%-i), Ağstafada 22 mm (aylıq normanın 92%-i), Gəncədə 16 mm (aylıq normanın 84%-i) təşkil edib.

Bundan başqa, Qubada 4 mm, Gədəbəy, Şəmkir, Qəbələdə 3 mm, Daşkəsəndə 2 mm, İsmayıllı, Tərtər, Göyçayda 1 mm yağıntı müşahidə olunub. Abşeron yarımadasının bəzi ərazilərində (Biləcəri və Sumqayıtda) gecə saatlarında az yağış qeydə alınıb. Şimal-qərb küləyi Abşeron yarımadasında və Abşeron dəniz rayonunda 15-20 m/s-dək güclənib. Neft Daşları stansiyasının məlumatına əsasən dalğanın hündürlüyü 2.2 metrə çatıb. Temperatur: Aran rayonlarında 34-37, dağlıq rayonlarda 19-22, Abşeron yarımadasında isə 30-33 dərəcə isti olub.

Milli Hidrometeorologiya Departamentinin proqnozlarına görə, qeyri-sabit hava şəraitinin avqustun 10-u gündüz saatlarınadək davam edəcəyi, bəzi rayonlarda arabir yağış yağacağı, əsasən, gecə və axşam saatlarında lokal leysan xarakterli olacağı gözlənilir. Şimal-qərb küləyinin avqustun 8-də və 9-na keçən gecə 15-20 m/s, arabir isə hətta 23-28 m/s-dək güclənəcəyi gözlənilir. Çaylarda sululuğun artacağı, bəzi dağ çaylarından qısamüddətli daşqın və sel keçəcəyi istisna olunmur.

Yaxın 3 gün ərzində Abşeron yarımadasında havanın nisbətən sərinləşməsinə baxmayaraq, atmosfer təzyiqinin xeyli tərəddüdü, avqustun 8-də başlayan güclü küləyin 9-u gündüz saatlarından etibarən mülayimləşməsi, havada rütubətliliyin normadan çox olması gözlənilir. Bu cür qeyri-sabit meteoroloji şərait meteohəssas insanlar üçün nisbətən əlverişsizdir.

Azərbaycan_hava