Sosial

Ana səhifə

Sosial

Azərbaycanla Dünya Bankı arasında «Təhsil sektorunun inkişafı» layihəsi üzrə 25 mln. dollarlıq kredit sazişi imzalanıb

24 sentyabr 2008 10:07 (UTC +04:00)

Vəsait Azərbaycana DB-nın üzvü olan Beynəlxalq İnkişaf Assosiasiyası (IDA) tərəfindən ayrılacaq. Sənədi Azərbaycan tərəfindən təhsil naziri Misir Mərdanov, kreditor tərəfindən isə DB-nın Bakı ofisinin rəhbəri Qreqori Yedjeyçak imzalayıblar.
«APA-Economics»in məlumatına görə, tədbirdə çıxış edən M.Mərdanov qeyd edib ki, Təhsil Nazirliyi DB ilə təxminən 10 ildir əməkdaşlıq edir və bu müddət ərzində ümumilikdə DB təhsil sahəsinə kredit və qrant şəklində 30 mln. dollara yaxın vəsait ayırıb.
«Ümumiyyətlə, «Təhsil sektorunun inkişafı» üzrə ikinci layihənin icrasına 45,4 mln. dolların ayrılması nəzərdə tutulub ki, bunun da 25 mln. dollarını DB-nın üzvü olan IDA, 20,4 mln. dollarını isə Azərbaycan hökuməti ayıracaq. Kreditin şərtlərinə gəldikdə isə, Azərbaycan 2018-ci ildən başlayaraq 2028-ci ilədək illik 1,25% ilə vəsaiti qaytaracaq. Əgər vəsait bu müddət ərzində tam həcmdə qaytarılmasa, onda 2043-cü ilədək kredit illik 2,5% ilə ödəniləcək», - deyə M.Mərdanov bildirib. Kreditin ilk 10 ili güzəştli dövr hesab olunur.
Nazirin sözlərinə görə, DB ilə aparılan əməkdaşlıq nəticəsində Azərbaycanda təhsilin keyfiyyəti bir qədər də yüksələcək: «Yaxın illər ərzində Azərbaycanda təhsil ümumdünya səviyyəsinə çatacaq».
M.Mərdanov həmçinin qeyd edib ki, 2009-cu ildə dövlət büdcəsindən ölkənin təhsil sektoruna 1,3 mlrd. manat həcmində vəsaitin ayrılması nəzərdə tutulur.
Tədbirdə çıxış edən Q.Yedjeyçak isə öz növbəsində bildirib ki, bu layihə beynəlxalq təcrübəyə əsaslanır və özündə təhsil islahatlarını əks etdirir: «Layihə çərçivəsində Azərbaycanda fəaliyyət göstərən müəllimlərin peşəkarlıq səviyyəsi yüksələcək və müəllimlərin tədis sistemi Avropa standartlarına cavab verəcək».
Qeyd edək ki, «Təhsil sektorunun inkişafı» üzrə ikinci layihə 6 komponentdən ibarətdir. Bura kurrikulum islahatının aparılması, müəllimlərin peşəkarlıq səviyyəsinin artırılması, şagird nailiyyətlərinin qiymətləndirilməsinə dair məlumatların keyfiyyətin yüksəldilməsində istifadəsi, təhsil idarəetmə orqanlarının idarəetmə imkanlarının gücləndirilməsi, məktəblərdə təhsilin inkişafı, layihənin monitorinqi və qiymətləndirilməsi daxildir.
Xatırladaq ki, ümumilikdə bu layihə 2003-2013-cü illəri əhatə edir.
Azərbaycan 1992-ci ildən DB-nın üzvüdür. Bu müddət ərzində DB ölkədə həyata keçirilən 45 layihə üçün 2 mlrd. dollardan artıq vəsait ayırıb.