Sosial

Ana səhifə

Sosial

Azərbaycanda ümumrespublika turizm konfransı keçirilib - YENİLƏNİB

Azərbaycanda ümumrespublika turizm konfransı keçirilib - <font color=red>YENİLƏNİB</font>

27 sentyabr 2008 10:54 (UTC +04:00)

«APA-Economics»in məlumatına görə, tədbirdə çıxış edən Azərbaycanın mədəniyyət və turizm nazirinin müavini Teymur Mehdiyev bildirib ki, hazırda ölkədə müvafiq turizm ərazilərinin seçilməsi, dağlıq ərazilərdə turizm infrastrukturunun yaradılması üçün Mədəniyyət və Turizm Nazirliyi tərəfindən iş aparılır.
Konfransda çıxış edən Mədəniyyət və Turizm Nazirliyi turizm şöbəsinin müdiri Aydın İsmiyev isə qeyd edib ki, hazırda Azərbaycanda 337 mehmanxana və ona bərabər tutulan obyekt fəaliyyət göstərir ki, bunun da 71-i Bakı şəhərində yerləşir. Lakin ümumiyyətlə, indiyədək 230 mehmanxanaya lisenziya verilib.
A.İsmiyev əlavə edib ki, ölkədə 232 turizm şirkəti fəaliyyət göstərir və bunun 39-u cari ilin yanvar-iyun ayları ərzində açılıb: «Bu ilin ilk altı ayında Azərbaycana 782 839 turist gəlib ki, bu da ötən ilin analoji dövrü ilə müqayisədə 34,2% çoxdur. Cari ilin yanvar-iyun ayları ərzində ölkənin turizm sahəsində 94,5 mln. ABŞ dolları məbləğində gəlir əldə olunub».
A.İsmiyevin sözlərinə görə, ölkədə turizm sahəsi inkişaf etsə də, bu sahədə olan vəziyyət tam qaneedici səviyyədə deyil və xidmətlərin keyfiyyəti müasir standartlara cavab vermir. Şöbə rəisi bunun əsas səbəbini kadrların peşə hazırlığının aşağı səviyyədə olması ilə əlaqələndirib: «Yaxın 3-4 il ərzində Azərbaycanda turizm xidmətlərinin keyfiyyətinin yüksəlməsinə ümid etmək olar».
Tədbirdə iştirak edən mədəniyyət və turizm naziri Əbülfəs Qarayev «Qala Travel» və «Karbminvod» şirkətlərinə turizm fəaliyyəti ilə, «Göy qurşağı» şirkətinə isə Şamaxıda otel kimi fəaliyyət göstərməsi üçün lisenziya verilib. Mingəçevirdə fəaliyyət göstərən «Liversayt» mehmanxanasına isə 4 ulduzlu otel sertifikatı təqdim edilib.
Bununla yanaşı konfransda turizm nominasiyaları üzrə mükafatlar da təqdim olunub. Bu il ən yaxşı 5 ulduzlu otel kimi «Exselsior», 3 ulduzlu otel kimi «Gəncə» mehmanxanası, ən yaxşı butik otel kimi Bakıdakı «Meridian» mehmanxanası seçilib. Azərbaycanın regional turizm bazasını ən yaxşı təqdim edən Quba rayon və Lənkəran şəhər mədəniyyət və turizm şöbələri olub.