Sosial

Ana səhifə

Sosial

Bakıda «Korporativ sosial məsuliyyətə dair fəaliyyətin ölçülməsi və hesabatlılığı» mövzusunda konfrans keçirilib

29 yanvar 2009 10:30 (UTC +04:00)

Bakı. Elnur Hüseynquluyev – APA-Economics. Bu gün İqtisadi Tədqiqatlar Mərkəzi (İTM) «Korporativ sosial məsuliyyətə dair fəaliyyətin ölçülməsi və hesabatlılığı» mövzusunda növbəti konfrans keçirib.
«APA-Economics»in məlumatına görə, tədbirdə İTM-in İdarə Heyətinin sədr müavini Vüsal Qasımlı bildirib ki, layihənin əsas məqsədi biznes icmasının cəmiyyətlə dialoqu, sosial tərəfdaşlıq və şəffaflığın təminatı vasitəsi ilə onlara inamın artırılması, müntəzəm olaraq qeyri-maliyyə hesabatlılığının təminatına təşkilati, metodiki və informasiya yardımı göstərməkdir.
V.Qasımlı Azərbaycanda korporativ sosial məsuliyyətlə bağlı fəaliyyətin tənzimlənməsi istiqamətində normativ hüquqi bazanın zəif olduğunu bildirib: «Şirkətlər yalnız özlərinin daxili normativ aktlarına uyğun olaraq bu istiqamətdə fəaliyyətlərini həyata keçirirlər».
V.Qasımlı layihə çərçivəsində ölkədə fəaliyyət göstərən biznes strukturları arasında keçirilmiş sorğunun nəticələrini də açıqlayıb. Sorğu 100 iri biznes strukturu arasında, respondentlərin təsadüfi seçim yolu ilə aparılmaqla anonim həyata keçirilib. Bu şirkətlərdən cəmi 38-i İTM-ə cavab məktubu göndərib və bunlardan biri sorğudan imtina, 37-i isə sorğu anketinə cavab verib.
Sorğunun nəticələrinə görə, orta və iri şirkətlər sosial sərmayə proqramları həyata keçirir və bu istiqamətdə gənclərlə iş və humanitar məqsədlərə daha çox üstünlük verilir. Həmçinin, yerli şirkətlər korporativ sosial məsuliyyət siyasətində əsasən Qərb təcrübəsinə əsaslanır.
V.Qasımlının sözlərinə görə, əksər şirkətlərdə sosial hesabatların açıqlanması istiqamətində müəyyən problemlər mövcuddur. Bu cür şirkətlərdə sosial hesabatların hazırlanması sahəsində ayrıca qrup fəaliyyət göstərmir.
Qeyd edək ki, layihə Azərbaycan Respublikası Prezidenti yanında Qeyri-Hökumət Təşkilatlarına Dövlət Dəstəyi Şurası tərəfindən maliyyələşdirilib.