Sosial

Ana səhifə

Sosial

Azərbaycanda keçiriləcək əhalinin siyahıya alınmasına texniki hazırlıq başa çatır

16 mart 2009 13:47 (UTC +04:00)

Bakı. Aynur Vəliyeva – APA-Economics. Azərbaycanda bu il keçiriləcək əhali siyahıyaalınmasının materiallarının işlənməsi ilə əlaqədar Dövlət Statistika Komitəsi tərəfindən 200 kompüter və 2 server alınaraq quraşdırılıb.
Qeyd edək ki, ötən il Dövlət Statistika Komitəsi tərəfindən komitənin mərkəzi aparatında və onun struktur bölmələrində kompüterlərin və proqram təminatının vəziyyətinin yaxşılaşdırılması məqsədi ilə fərdi kompüterlərin, proqram təminatının, həmçinin sürət çıxaran texnika alınıb.
Bununla yanaşı statistika sistemində müasir tələblərə cavab verməyən kompüterlər yeniləri ilə əvəz edilib.
Xatırladaq ki, Azərbaycanda əhalinin siyahıya alınmasına aprelin 13-də başlamağa planlaşdırır. Aprelin 22-dək davam edəcəyi gözlənilən siyahıyaalmanın təşkili və keçirilməsi üçün 2009-cu il dövlət büdcəsində 5 460 619 min manat (6,8 mln. ABŞ dolları) vəsait nəzərdə tutulub. Komitədən bildirilib ki, 10 ildən bir keçirilən bu mühüm kampaniyanın mütəşəkkil şəkildə keçirilməsi üçün görülən hazırlıq işləri artıq yekunlaşmaq üzrədir. Belə ki, 57 şəhər, 124 qəsəbə, 69 iri kənd yaşayış məntəqəsinin sxematik planı, 58 rayonun xəritəsi hazırlanıb və yerli statistika orqanlarına təqdim edilib. Həmçinin, 29 sualdan ibarət olacaq sorğu vərəqələri də hazırlanıb. Sualların 80%-i BMT-nin tövsiyələri əsasında tərtib olunub. Bunlar, əhalinin coğrafi, demoqrafik, iqtisadi, sosial vəziyyəti, etnik-mədəni, mənzil şəraiti ilə bağlı olacaq.
Bundan başqa, ölkə üzrə 540 siyahıyaalma məntəqəsi, 3 780 təlimatçı, 19 minə yaxın sayıcı məntəqəsi yaradılıb. Bu prosesə 24 mindən çox müvəqqəti işçi cəlb olunacaq, onlardan 19 mini sayıcılardır. Komitənin hesablamalarına görə, hər 1 sorğu keçirən işçinin üzərinə ən azı 45 ölkə sakini düşməlidir.
Xatırladaq ki, 2009-cu ilin yanvar ayının 1-nə Azərbaycanda əhalinin sayı 8,730 mln. nəfər olub.