Sosial

Ana səhifə

Sosial

Azərbaycanda 1037 nəfər süd vəzi xərçəngindən əziyyət çəkir

21 oktyabr 2009 10:52 (UTC +04:00)

Bakı. Kəmalə Quliyeva – APA. “Hazırda Azərbaycanda 7 min nəfərə yaxın onkoloji xəstə qeydiyyatdan keçib. Onlardan 1037 nəfəri süd vəzi xərçəngindən əziyyət çəkir. Bu o deməkdir ki, Azərbaycanda onkoloji xəstə olan hər 7 qadından biri süd vəzisi xərçəngidir”. APA-nın məlumatına görə, bu barədə jurnalistlər üçün süd vəzisinin xərçəngi mövzusunda bu gün keçirilən seminarda məlumat verilib. USAİD-ın İlkin Səhiyyə Xidmətlərin Gücləndirilməsi layihəsi, Milli Onkologiya Mərkəzi, Azərbaycan Tibb Universitetinin (ATU) Onkoloji Klinikası, BMT-nin Əhali Fondu, Lider Qadınlar və Demokratik İnkişaf İctimai Birlikləri tərəfindən təşkil olunan tədbir media təmsilçilərinin bu xəstəliyin dünyada və Azərbaycanda xəstələnmə səviyyəsi, qorunma üsulları, səbəb və ilkin simptomları barədə biliklərinin artırılması məqsədi ilə keçirilib.
Tədbirdə çıxış edən Lider Qadınlar İctimai Birliyinin sədri Məlahət İbrahimqızı bildirib ki, oktyabr ayı dünyanın inkişaf etmiş ölkələrində süd vəzisi xəstəliyinə qarşı mübarizə aylığı elan edilib: “Statistikaya əsasən, onkoloji xəstə hər onuncu qadın süd vəzisi xərçəngindən əziyyət çəkir. Təəssüf ki, keçmiş sovet ölkələrində, o cümlədən Azərbaycanda bu xəstəliyin daha çox gecikmiş formalarına rast gəlinir. Halbuki erkən aşkar olunmuş diaqnoz xəstəliyin sağalmasına səbəb ola bilir”.
Milli Onkologiya Mərkəzinin elmi işlər üzrə direktor müavini Rasim Cəfərov isə bildirib ki, süd vəzisi xərçəngi xərçəng xəstəlikləri arasında yayılma səviyyəsinə görə birinci yerdədir. R. Cəfərov bildirib ki, Milli Onkologiya Mərkəzi regionlarda pulsuz mamoqrafik müayinələr təşkil edir.
ATU-nun Onkoloji Klinikasının baş həkimi Nəsimi Qasımov isə bildirib ki, il ərzində klinikada 8 min ambulator, 5 min stasionar xəstəyə müayinə edilir. Baş həkim xatırladıb ki, 2006-cı ildə dünyada 6,3 milyon süd vəzisi xərçəngi dünyasını dəyişsə, 2050-ci ildə onların sayı 16 milyon nəfərə çatacaq.