Sosial

Ana səhifə

Sosial

İran parlamentinin nümayəndə heyəti Dövlət Sosial Müdafiə Fondunda olub

11 noyabr 2009 10:51 (UTC +04:00)

Bakı. Aynur Vəliyeva - APA-Economics. Azərbaycanda səfərdə olan İran İslam Cümhuriyyəti İslam Şurası Məclisinin Sosial məsələlər komissiyasının sədri Süleyman Cəfərzadənin başçılıq etdiyi nümayəndə heyəti Dövlət Sosial Müdafiə Fondunda (DSMF) olub.

DSMF-nin ictimaiyyətlə əlaqələr sektorunun rəhbəri Elman Babayevin «APA-Economics»ə verdiyi məlumata görə, görüş zamanı fondun sədri Səlim Müslümov qonaqları təşkilatın iş fəaliyyəti, mərkəzləşdirilmiş idarəetmə, fərdi uçotun avtomatlaşdırılması sistemləri, sosial sığorta şəhadətnamələrinin çapı mərkəzi ilə yaxından tanış edib və son illər ərzində görülən işlər haqda məlumat verib.

Perspektivdə həyata keçiriləcək tədbirlərdən bəhs edən DSMF sədri vurğulayıb ki, Azərbaycanda pensiyaların təyinatının avtomatlaşdırılması istiqamətində işlərin yaxın perspektivdə davam etdirilməsi nəticəsində bu sahədə şəffaflıq tam təmin olunacaq.

S.Müslümov eyni zamanda bildirib ki, Fondda bir gün ərzində 38 min məktubun çap edilməsinə imkan verən avadanlıq quraşdırılıb. Gələcəkdə hər ilin sonunda mərkəzləşdirilmiş avtomatlaşdırılmış internet sistemində olan hər bir sığortaolunanın fərdi hesabında il ərzində toplanan ümumi məbləği və məbləğin hansı sığorta edən tərəfindən göndərildiyini əks etdirən göstəricilər çap edilərək ona göndəriləcək. Bununla yanaşı, insanlar internet vasitəsilə Fondun bazasına daxil olaraq sosial sığorta şəhadətnaməsinin nömrəsini daxil edib ona məxsus olan nə qədər məbləğin yığılması və vəsaitlərin hansı mənbələrdən daxil olduğu haqda məlumat ala biləcəklər.

S.Müslümov görüş zamanı bildirib ki, Azərbaycan mənbələrindən əmək ödənişi və məcburi dövlət sosial sığorta haqqına cəlb olunan digər gəlirləri əldə edən əcnəbilərin məcburi dövlət sosial sığortası ilə əhatə olunması prosesi çərçivəsində fərdi uçot sistemində uçota alınan əcnəbilərin sayına görə İran 4-cü yerdə qərarlaşıb.

İran parlamentinin nümayəndə heyətinə rəhbərlik edən Süleyman Cəfərzadə öz növbəsində DSMF-də görülən işləri yüksək qiymətləndirib. “Qısa müddət ərzində çox böyük uğurlar əldə etmisiniz” - deyən qonaq Azərbaycanın sığorta-pensiya sistemində əldə etdiyi müsbət təcrübənin digər ölkələr üçün nümunə ola biləcəyini deyib və İranın Sosial Təminat Təşkilatının fəaliyyəti barədə məlumat verib.

Görüşdə ölkəmizdə ikitərəfli əməkdaşlıq perspektivləri barədə geniş fikir mübadiləsi aparılıb. Eyni zamanda qonaqlara ölkəmizdə torpaq mülkiyyətçilərinin sosial sığorta sistemində iştirakı haqda geniş məlumat verilib və Azərbaycanda bu istiqamətdə görülən işlər İran nümayəndə heyətinin marağına səbəb olub.

Sonda Süleyman Cəfərzadə DSMF sədrini İrana səfərə dəvət edib.