Sosial

Ana səhifə

Sosial

Gürcüstanda ustad sənətkar Aşıq Musa Qaraçöplünün 125 illik yubileyi keçirilib

16 may 2010 00:06 (UTC +04:00)

Qaraçöp. Nizami Məmmədzadə-APA. Bu gün Gürcüstanın Qaraçöp (Saqareco) mahalında məşhur el aşığı, ustad sənətkar Aşıq Musanın 125 illik yubileyi keçirilib. Bu barədə Azərbaycan Yazıçılar Birliyinin Gürcüstan filialının rəhbəri, şair Rafik Hümbət APA-nın Gürcüstan bürosuna məlumat verib. Onun sözlərinə görə, tədbir Qazılar kənd məscidinin həyətində yüksək səviyyədə təşkil olunub. Tədbirdə pedaqoji elmlər namizədi Fərhad Xubanlı, Saqareco rayon icra başçısının müavini Qoça Çerkezişvili, yazıçı-dramaturq Nəriman Əbdürrəhmanlı, ustad Aşıq Aslan Kosalı, şair-tərcüməçi Zezva Medulaşvili, AYB-nin Gürcüstan filialının rəhbəri Rafiq Hümbət, Aşıq Arif Qarayazılı, müğənni Xəlil Qaraçöp və başqaları Aşıq Musa yaradıcılığı barədə öz ürək sözlərini söyləyiblər.
Şair Rafiq Hümbət APA-ya bildirib ki, Aşıq Musa Borçalıda, Azərbaycanda, eləcə də Gürcüstanın digər bölgələrində yaşayan və ustad aşıqlar tərəfindən sevilən məşhur aşıq olub. “O, sənətkarlığı ilə, ustad kimi şagird yetişdirməyi ilə, aşıq mahnılarını ifa etməyi ilə yaddaşlarda qalıb, tarixdə Aşıq Musa Qaraçöplü kimi tanınıb. Aşıq Musanı məşhur Borçalı aşıqlarından Aşıq Əmrah Gülməmmədov, Aşıq Hüseyn Saraclı, Aşıq Xındı Məmməd və Aşıq Kamandar yaxşı tanıyıb və onun yaradıcılığına ətraflı bələd olublar, onu ehtiramla xatırlayıblar. Aşıq Musanın Faxralı Şair Nəbi ilə, Aşıq Şenlik ilə əlaqələri, yaradıcılıq deyişmələri olub. Onun qələmə aldığı poeziya nümunələri bu gün də yaddaşlarda yaşayır, el aşıqları onun qoşmalarını ifa edirlər.”

Yubileydə iştirak edən, Bakıdan gəlmiş yazıçı-dramaturq Nəriman Əbdürrəhmanlı APA-ya bildirib ki, Aşıq Musanın pedaqoji elmlər namizədi Fərhad Xubanlı ilə birlikdə tərtib etdiyimiz “Musa eldən aralanmaz” kitabını nəfis şəkildə nəşr etmişik. “Əlimizdə olan külliyyatını, bizə gəlib çatan şeirlərini, təxminən 400 səhifəlik yüksək nəfis tərtibatla çap etdiyimiz kitaba toplamışıq. Burada onun qoşmaları, gəraylıları, təcnisləri, dodaqdəyməzləri, deyişmələri, dastanları, söyləmələri, yəni onun hərtərəfli yaradıcılığını əhatə edən əsərləri verilib. Qaraçöpdə aşıqlar çoxdur, onların hamısının ustadı Aşıq Musadır. Mayın 21-də Bakıda Mahnı Teatrında Azərbaycan Aşıqlar Birliyinin xətti ilə Aşıq Musanın 125 illik yubileyi Xalq şairi Zəlimxan Yaqubun rəhbərliyi ilə qeyd olunacaq.”

Qaraçöpdə təşkil edilmiş Aşıq Musanın 125 illik yubileyinə Tblisidən, Laqodexinin Qabal kəndindən, Qarayazıdan, Bakıdan və digər yerlərdən gəlmiş görkəmli elm adamları, gürcü və Azərbaycan alimləri, şairlər, ziyalılar və gənclər qatılıblar.