Sosial

Ana səhifə

Sosial

Masallı ünvanlı sosial yardım sahəsində özünü təmin etmə proqramının sınaqdan keçiriləcəyi pilot rayonların siyahısına salınıb

13 avqust 2010 12:54 (UTC +04:00)

Bakı. İlhamə İsabalayeva – APA. Əmək və Əhalinin Sosial Müdafiəsi Nazirliyi Astara, Lənkəran, Lerik, Masallı, Yardımlı, Cəlilabad rayon Əhalinin Sosial Müdafiəsi mərkəzlərinin məsul şəxslərinin iştirakı ilə Masallıda zona müşavirəsi keçirib. Nazirlikdən APA-ya verilən məlumata görə, ƏƏSMN-in yoxsulluq problemləri və ünvanlı sosial yardım siyasəti şöbəsinin müdiri Natiq Qasımovun sədrliyi ilə keçən müşavirədə bölgədə ünvanlı sosial yardım proqramının icrası sahəsində görülən işlər təhlil olunub, yoxsul ailələrin aktiv sosial müdafiə tədbirləri vasitəsi ilə özünü təmin etməsinə şəraitin yaradılması, onların yoxsulluq vəziyyətindən çıxarılması məsələləri müzakirə edilib.

Müşavirədə qeyd olunub ki, bir çox ölkələrdə olduğu kimi, Azərbaycanda da şərtləndirilmiş sosial yardımın verilməsi prinsiplərinin tətbiqi imkanlarının araşdırılmasına, yoxsul ailələrin mövcud şərait, potensial imkanlarının nəzərə alınmaqla onların reabilitasiyasına, aylıq gəlirlərinin artmasına xidmət edən işlərin görülməsinə başlanılıb. Bununla əlaqədar olaraq, bir sıra yeniliklərin həyata keçirilməsi, o cümlədən aztəminatlı ailələrə müvafiq hallarda sosial xidmətin göstərilməsi, həmin ailələrin əmək qabiliyyəti üzvlərinin aktiv məşğulluq tədbirləri vasitəsilə məşğulluğunun təmini və gücləndirilməsi nəzərdə tutulur. Eyni zamanda, ünvanlı yardımların daha effektiv və ailə gəlirlərinin artmasına istiqamətlənmiş formada xərclənməsinə real şəraitin yaradılması məqsədi ilə onlarla sosial müqavilələrin bağlanması planlaşdırılır. Ünvanlı sosial yardım sistemində həyata keçirilməsi nəzərdə tutulan yeniliklər ailələrin yoxsulluğuna səbəb olan amilləri aradan qaldırmaqla, onlar üçün özünü təmin etmə şəraitinin yaradılmasına xidmət edir. Dünya Bankı tövsiyəsi əsasında özünü təmin etmə proqramı 1 il müddətinə İsmayıllı və Qubada sınaqdan keçiriləcək.

Müşavirədə mövzu ilə bağlı geniş fikir mübadiləsi aparılıb. Bununla yanaşı, daha bir rayonda – Masallıda da sözügedən proqramların sınaq işlərinə başlanması qərara alınıb.

Müşavirədə həm də əhalinin müraciətlərinə həssas, ədalətli yanaşması ilə bağlı yerli mərkəz direktorlarına tapşırıqlar verilib.