Sosial

Ana səhifə

Sosial

Ombudsman Mübariz İbrahimova həsr edilmiş tədbir keçirib

16 avqust 2010 18:56 (UTC +04:00)

Bakı-APA. Azərbaycan Respublikasının İnsan Hüquqları üzrə Müvəkkili Elmira Süleymanova Biləsuvar rayonunun Əliabad kəndinə gedərək, 2010-cu il iyunun 18-dən 19-na keçən gecə şəhid olmuş Azərbaycan Silahlı Qüvvələrinin hərbi qulluqçusu, Milli Qəhrəman Mübariz Ağakərim oğlu İbrahimovun valideynləri ilə görüşüb. Bu barədə APA-ya Ombudsman aparatından məlumat veriblər. O, mərhumun ailəsinə və yaxınlarına başsağlığı verərək, Mübarizin böyük şücaətinin gənclərdə, Milli ordumuzun əsgər və zabitlərində vətənpərvərlik hissinin, ruh yüksəkliyinin, döyüş əzminin daha da artırdığını, onlara örnək olduğunu vurğulayıb.

Ombudsman ölkə prezidenti, Ali Baş Komandan İlham Əliyev tərəfindən Mübariz İbrahimovun ölkəmizin müstəqilliyinin və ərazi bütövlüyünün qorunub saxlanılmasında müstəsna xidmətlərinə və göstərdiyi rəşadətə görə Milli Qəhrəman adına layiq görülməsini xalqımız tərəfindən yüksək qiymətləndirildiyini bildirib.

Müvəkkil yeni tikilmiş və fəaliyyətinə sentyabr ayında başlayacaq orta təhsil müəssisəsi olan və Mübariz İbrahimovun adı verilmiş Biləsuvar Şəhər Məktəb Lisey Kompleksində Milli Qəhrəmana həsr edilmiş tədbir keçirib. Tədbirdə rayon rəhbərliyi, ictimaiyyət nümayəndələri, şəhidin qohumları, oxuduğu kənd məktəbinin və adı verilmiş liseyin direktorları, keçmiş sinif yoldaşları, çoxsaylı gənclər, həmçinin Bakıdan gəlmiş Ombudsmanın uşaq hüquqları üzrə resurs mərkəzi olan Uşaq və Gənclərin Sülh Şəbəkəsinin (UGSŞ) üzvləri və bu şəbəkə nəzdində Liderlik məktəbinin yetirmələri iştirak ediblər. Şəhidin ruhu bir dəqiqəlik sükutla yad edilib.

E.Süleymanova Ermənistanın Azərbaycana qarşı uzun illərdən bəri davam edən təcavüzü nəticəsində torpaqlarımızın 20 faizinin işğal edildiyini, on minlərlə azərbaycanlının həlak olduğunu, bir milyon soydaşımızın qaçqına və məcburi köçkünə çevrildiyini, minlərlə Azərbaycan vətəndaşının əsir və itkin düşdüyü, girov götürüldüyünü söyləmiş, buna baxmayaraq, xalqımızın əzminin qırılmadığını, Mübariz kimi qəhrəman oğullar yetişdiyini diqqətə çatdırıb.

Müvəkkil işğal altında olan torpaqlarımızda ilk şəhid olan Mübariz İbrahimovun cəsarəti nəticəsində adını tarixə yazaraq, gənclərimizə örnək olduğunu, hər bir insanın o cümlədən gənclərin qəlbində özünəməxsus yer tutduğunu, vətənpərvərlik nümunəsi göstərdiyini vurğulayıb.

O, Milli Qəhrəmanın etdiyi igidliyin erməni daşnaqlarını sarsıtması səbəbindən onun nəşinin bugünədək verilməməsi düşmən erməni terrorçuların mənfur xislətə malik olmaları bütün dünya ictimaiyyətinə bir daha məlum olduğunu qeyd edib.

Ombudsman beynəlxalq humanitar hüquq normalarına, o cümlədən beynəlxalq humanitar hüququn bir hissəsi olan Müharibə qurbanlarının müdafiəsinə dair 1949-cu il tarixli Cenevrə Konvensiyalarına uyğun olaraq, cəsədin qaytarılması ilə bağlı Cenevrədə yerləşən Beynəlxalq Qırmızı Xaç Komitəsinin prezidenti Yakob Kellenbergerə məktubla müraciət etdiyini, Bakı ofisinin rəhbərliyi ilə əlaqələrin və bu məsələnin daim diqqətdə saxladığını bildirib.

E.Süleymanova həmçinin İnsan Hüquqlarının Müdafiəsi üzrə Milli Fəaliyyət Planının icrası ilə əlaqədar rayonlarda keçirdiyi ictimai dinləmər zamanı, hərbi hissələrdə zabit və əsgərlərlə görüşlərdə Mübarizin öz valideynlərinə yazdığı son məktubu oxuduğunu, onun qəhrəmanlığı haqqında məlumat verdiyini diqqətə çatdırmış və ölkəmizin əhalisi tərəfindən şəhidin ailəsinə mənəvi dəstəyi vurğulayıb.

Müvəkkil Milli Qəhrəmanın adının əbədilləşdirilməsi məqsədilə uşaq və gənclərə örnək olan Mübariz İbrahimovun şərəfinə yeni dərs ilinin ilk günündə təhsil ocaqlarında onun həyat və döyüş anları haqqında dərslərin keçirilməsini, bu qəhrəmanlıq səlnaməsi yazan gəncin həyatından bəhs edən kitab və xatirələrin yazılmasını təklif etmiş, bu haqda filmin çəkildiyini bildirib.

Sonra Rayon İcra Hakimiyyətinin başçısı Adil Məmmədov, şəhidin oxuduğu məktəbin direktoru Bəsirə Rüstəmova, yaşadığı kəndin icra nümayəndəsi Seyidağa Quliyev, adı verildiyi Biləsuvar Şəhər Məktəb Lisey Kompleksinin direktoru Anar Məmmədov, keçmiş sinif rəhbəri və yoldaşları, Uşaq və Gənclərin Sülh Şəbəkəsinin üzvləri, Liderlik məktəbinin yetirmələri İlahə Bağırova, Əhməd Nəsibov, Elman Aslanov və digər iştirakçılar çıxış edərək, Milli Qəhrəmanın səmimi, qorxmaz, cəsarətli olduğunu, şərəfli, nümunəvi hərbi xidmət göstərdiyini, örnək gənc kimi daim qəlblərdə yaşayacağını bildiriblər.

E.Süleymanova Milli Məclisin deputatı Qənirə Paşayevanın şəhidin şərəfinə hazırladığı fotoşəkillərdən ibarət stendi bu məktəbə təqdim edib.