Sosial

Ana səhifə

Sosial

Sumqayıtçay və Qobustan alçaq dağlıq ərazilərində Dövlət Təbiət Yasaqlığı yaradılır

26 avqust 2010 08:03 (UTC +04:00)

Bakı. İlhamə İsabalayeva - APA. Ekologiya və Təbii Sərvətlər Nazirliyində 2010-cu ilin birinci yarısında görülmüş işlər və qarşıda duran vəzifələrə həsr olunan kollegiya iclası keçirilib. Nazirliyin mətbuat xidmətinin rəhbəri İradə İbrahimova APA-ya bildirib ki, iclasda 3 məsələ - Ətraf Mühitin Mühafizəsi, Meşələrin İnkişafı və Bioloji Müxtəlifliyin Qorunması və Xüsusi Mühafizə Olunan Təbiət Ərazilərinin İnkişafı departamentlərinin və onların tabeli qurumları üzrə 2010-cu ilin birinci yarısının yekunları və qarşıda duran vəzifələr müzakirəyə çıxarılıb.

Bildirilib ki, bu ilin ilk 6 ayı ərzində hüquqi və fiziki şəxslər tərəfindən yol verilmiş qanun pozuntularına görə 1204 akt və 397 protokol tərtib olunub, aşkar edilmiş nöqsanların aradan qaldırılması üçün müvafiq qanunvericiliyə əsasən 497 icrası məcburi olan göstəriş verilib. Tədbir görülməsi üçün hüquq-mühafizə orqanlarına göndərilmiş 65 işdən 17-nə, məhkəmələrə göndərilmiş 109 işdən 21-nə, məhkəmə nəzarətçiləri və icraçılarına göndərilmiş 249 işdən 30-na baxılaraq müvafiq tədbir görülüb.

Hesabat dövründə 1371 hektar sahədə meşə əkini və səpini işləri həyata keçirilib, meşə əkinlərinin becərilməsi məqsədilə 14459 hektar sahədə xidmət, 11970 hektar sahədə suvarma işləri aparılıb, müxtəlif ağac və kol cinslərindən 10099 kiloqram toxum tədarük edilib. Bununla yanaşı, Sumqayıtçay və Qobustan alçaq dağlıq ərazilərində Dövlət Təbiət Yasaqlığının yaradılması ilə bağlı işlər aparılır. Almaniya hökumətinin dəstəyi ilə “Qafqaz təşəbbüsü” proqramı çərçivəsində “Samur-Yalama” Milli Parkı layihəsi ilə əlaqədar tender vasitəsilə icraçı şirkət müəyyən edilərək fəaliyyətə başlanıb.

İ. Məmmədova deyib ki, ölkə ərazisində ilk dəfə olaraq ceyranların tarixi ərazilərinə reintroduksiya edilməsi məqsədilə layihə ilə əlaqədar təşkilati işlər başa çatdırılıb. İlin sonuna qədər ceyranların bir hissəsinin reintroduksiya ərazilərinə köçürülməsi planlaşdırılır.

Ekologiya_Sərvət