Sosial

Ana səhifə

Sosial

Azərbaycanın Sumqayıt və Almaniyanın Lüdviqshafen şəhərləri arasında yeni layihəyə start verilir

27 avqust 2010 11:50 (UTC +04:00)

Bakı - APA-Economics. Bu gün Sumqayıt şəhər İcra Hakimiyyətinin (ŞİH) başçısı Vaqif Əliyev Almaniyanın Lüdviqshafen şəhərinin nümayəndə heyətini qəbul edib.

Sumqayıt ŞİH-dən “APA-Economics”ə verilən məlumata görə, V.Əliyev Sumqayıt və Lüdviqshafen şəhərlərini birləşdirən 33 illik dostluq əlaqələrinin son dövrlər ərzində daha da möhkəmləndiyini, birgə layihələrin şəhərlərə qarşılıqlı fayda verdiyini bildirib. O, alman mütəxəssislərin dəstəyi ilə Sumqayıtda mühüm layihələrin icra olunduğunu, 2002-2009-cu illər ərzində şəhər təsərrüfatı, təhsil, səhiyyə, mədəniyyət və gənclərlə iş sahəsində tədbirlərin uğurla reallaşdırıldığını qeyd edib.

Almaniya nümayəndə heyətinin rəhbəri, Lüdviqshafen şəhərinin kommunal təsərrüfatının texniki direktoru Peter Lubenau Lüdviqshafenin meri xanım Eva Lozenin salamlarını V.Əliyevə çatdırıb. O, Almaniya Texniki Əməkdaşlıq Cəmiyyətinin (GTZ) dəstəyi ilə 2010-cu ildən etibarən yeni layihənin - “Cənubi Qafqazda yerli idarəetmənin inkişafına dəstək” proqramının başlanması barədə məlumat verərək bildirib ki, yeni proqram çərçivəsində Almaniyanın və Cənubi Qafqazın ümumilikdə 8 şəhəri əməkdaşlıq edəcək, Sumqayıt və Lüdviqshafen şəhərlərinin iştirakı ilə tullantı təsərrüfatı, çirklənmiş ərazilərin reabilitasiyası, su və kanalizasiya sisteminin idarə edilməsi, ekoloji tərbiyə, yerli iqtisadiyyata dəstək sahələrində məsləhət tədbirlər həyata keçiriləcək, həmçinin narkomaniya əleyhinə anonim mərkəzin, əqli cəhətdən qüsurlu uşaqlar üçün emalatxananın, və əhaliyə xidmət bürosunun yaradılması istiqamətində səylər gücləndiriləcək. Görüşdə həmçinin tərəflər arasında maraq doğuran digər məsələlər barədə də fikir mübadiləsi aparılıb.

Qeyd edək ki, “Almaniya-Qafqaz partnyor şəhərləri arasında əməkdaşlıq” layihəsi çərçivəsində 2002-2009-cu illər arasında 3 mərhələdə icra olunan bu tədbirlər şəhərlər arasında əlaqələrin möhkəmlənməsinə xidmət etməklə yanaşı, Sumqayıtın da inkişafına öz müsbət töhfəsini vermişdir. Layihə nəticəsində Sumqayıtda Alman-dili Mərkəzi, “Etimad” telefonu ofisi fəaliyyətə başlamış, “Ekopark” layihəsinin biznes-planı, məişət tullantıları təsərrüfatı üçün konsepsiya hazırlanmış, su və kanalizasiya sisteminin idarəçiliyi, çirklənmiş ərazilərin təmizlənməsi sahəsində geniş təcrübə mübadiləsi aparılmış, sumqayıtlı mütəxəssislər Almaniyada təlim kurslarına cəlb olunmuşdur. Layihə zamanı Sumqayıtda 2005, 2007 və 2010-cu illərdə 3 beynəlxalq konfrans təşkil edilmiş, görülmüş işlər barədə ictimaiyyət məlumatlandırılmışdır.