Sosial

Ana səhifə

Sosial

Azərbaycanda X Respublika Universiadasının açılışı olub

29 aprel 2011 14:16 (UTC +04:00)

Bakı. İlhamə İsabalayeva – APA. Bu gün Bakıda ali təhsil müəssisələri tələbələri arasında keçirilən X Respublika Universiadasının açılış mərasimi keçirilib. APA-nın məlumatına görə, tədbirin təşkilatçıları Azərbaycan Gənclər və İdman Nazirliyi, Azərbaycan Təhsil İşçiləri Azad Həmkarlar İttifaqı Respublika Komitəsi, Təhsil Nazirliyi və Milli Olimpiya Komitəsidir.

Azərbaycan Təhsil İşçiləri Azad Həmkarlar İttifaqı Respublika Komitəsinin sədri, millət vəkili Səttar Mehbalıyev bildirib ki, bu tədbirlərin məqsədi tələbələri kütləvi bədən tərbiyəsi-sağlamlıq və idman bölmələrində məşqlərə cəlb etmək, bədən tərbiyəsi və idmanın kütləviliyini daha da inkişaf etdirməklə Vətənin müdafiəsinə hazırlamaqdır. Təşkil olunan tədbirlər asudə vaxtlarda tələbələrin fəal istirahətlərini təmin etmək və onları bəd əməllərdən yayındırmaq, bədən tərbiyəsi və idman işlərinin daha da səmərəli, məqsədyönlü həyata keçirən bədən tərbiyəsi kollektivlərini və idman klublarını müəyyən etmək, onların iş üsulunu yaymaq məqsədi daşıyır. Eyni zamanda, burada məqsəd tələbələrin Ümumdünya Universiadasında, Beynəlxalq və Respublika yarışlarında iştirakı üçün tələbələrdən ibarət yığma komandaların tərkibini müəyyənləşdirməkdir.

Təhsil naziri Misir Mərdanov isə çıxışında Azərbaycan dövlət başçısının idmanın inkişafına çox önəm verdiyini deyib. Nazir universiadasının qalibinin Azərbaycanı Çində keçiriləcək Ümumdünya Universiadasında layiqincə təmsil edəcəyinə ümid etdiyini söyləyib.

Gənclər və idman nazirinin müavini İsmayıl İsmayılov isə əlavə edib ki, dövlət başçısının idmana göstərdiyi qayğı nəticəsində ötən il idmançılar ölkəyə 675 medal gətiriblər. Keçən il ərzində Azərbaycanda 49 dünya, beynəlxalq və Avropa səviyyəli yarış keçirilib.