Sosial

Ana səhifə

Sosial

“Azərbaycan Gəncliyi 2011-2015-ci il Dövlət Proqramı”nın hazırlanması ilə bağlı ictimai müzakirə keçirilib

03 may 2011 14:18 (UTC +04:00)

APA-nın məlumatına görə, əvvəlcə işçi qrupları çərçivəsində gənclərin sosial müdafiəsi və sağlamlığı, məşğulluğu və sahibkarlıq fəaliyyətinin dəstəklənməsi, vətənpərvərlik və vətəndaşlıq tərbiyəsi, elm, təhsil və gənclərin yaradıcılıq potensialının inkişafı, gənclərin idarəetmədə və vətəndaş cəmiyyətində iştirakı, o cümlədən beynəlxalq əməkdaşlıq və mübadilə mövzularında müzakirələr aparılıb.

Sonra gənclər və idman naziri Azad Rəhimov, Prezident Administrasiyasının şöbə müdiri Elnur Aslanov, təhsil nazirinin müavini Elmar Qasımov, Prezidenti yanında Dövlət Qulluğu Məsələləri üzrə Komissiyanın sədri Bəhram Xəlilovun iştirakı ilə ümumi müzakirələr keçirilib. Əvvəlcə işçi qrupların aparıcıları bölmələrində aparılan müzakirələr haqda məlumat veriblər. Aparıcılar bildiriblər ki, bölmələrdə Qarabağ münaqişəsi ilə bağlı müxtəlif ölkələrdə forumların təşkili, müxtəlif ölkələrin internet domenlərində Qarabağ adlı saytlarının açılması, məktəblilərin hərbi hissələrə aparılması, professional zabitlərin onlara dərs deməsi, internat məktəblərinin məzunlarının faizsiz ipoteka yolu ilə mənzil almaları, internat məktəblərində karyera mərkəzlərinin yaradılması, regionlarda biznes mərkəzlərinin inkişafı, ixtisas seçimi ilə bağlı kadrların buraxılması, orta və ali ixtisas məktəblərinin biznes qurumları ilə əlaqəsi və digər təkliflər səsləndirilib.

İctimai müzakirələrə İngiltərədə təhsil alan azərbaycanlı tələbələr də “skype” vasitəsilə toplantıya qoşulublar və öz təkliflərini irəli sürüblər. Sonra geniş müzakirələrə start verilib.

E. Aslanov bildirib ki, tarix dərslərində Azərbaycan tarixinin təqdimatına dəyişiklik edilməlidir: “Azərbaycan regionda iqtisadi cəhətdən lider olduğu kimi, intellektual insan potensialı baxımından da liderə çevrilməlidir. Bundan sonra ictimai müzakirələr ali məktəblərdə davam etdirilməlidir. Həmçinin gənclər üçün xüsusi mətbu orqan yaradılmalıdır. Əlillər üçün xüsusi təhsil mərkəzlərinin yaradılmasına da önəm verilməlidir”.

Sonda dövlət və hökumət nümayəndələri gəncləri maraqlandıran sualları cavablandırıblar.