Sosial

Ana səhifə

Sosial

Qaçqın və Məcburi Köçkünlərin İşləri üzrə Dövlət Komitəsində «Heydər Əliyev və məcburi köçkün gənclər» mövzusunda tədbir keçirilib

05 may 2011 11:02 (UTC +04:00)

Bakı. Rəşad Süleymanov-APA. Qaçqın və Məcburi Köçkünlərin İşləri üzrə Dövlət Komitəsində «Heydər Əliyev və məcburi köçkün gənclər» mövzusunda tədbir keçirilib. APA-nın məlumatına görə, tədbirdə çıxış edən komitənin sədri, baş nazirin müaavini Əli Həsənov bildirib ki, rəhbərlik etdiyi qurum tərəfindən Heydər Əliyevin doğum gününə həsr olunmuş rəsm və şeir müsabiqəsinin elan edib. Müsabiqəyə məcburi köçkün rayonlardan 70-dən çox rəsm əsəri, 65 şeir təqdim olunub. Rəsm və şeir müsabiqəsinin hər birində birinci yer üçün 300 manat, ikinci yer üçün 200 manat, üçüncü yer üçün isə 150 manat məbləğində mükafat müəyyən olunub.

Qaliblərə mükafatlar təqdim olunandan sonra tədbirdə iştirak edən dövlət və hökumət nümayəndələrinin, millət vəkilləri və gənclərin çıxışları dinlənilib. Ə. Həsənov bildirib ki, H. Əliyev istər SSRİ dövründə, istərsə də sonralar fəaliyyətində həmişə gəncləri dəstəkləyib. Məhz bu gün ölkə rəhbərliyində təmsil olunan insanların əksəriyyəti H. Əliyevin ölkəyə ilk dəfə rəhbərlik etdiyi dövrlərdə təhsil almış insanlardır.

Prezident Administrasiyasının siyasi təhlil və informasiya təminatı şöbəsinin müdiri Elnur Aslanov isə çıxışında təməli H. Əliyev tərəfindən qoyulan gənclər siyasətinin hazırda dövlət başçısı İlham Əliyev tərəfindən uğurla həyata keçirildiyini vurğulayıb. «2011-2015-ci illərdə Azərbaycan gəncliyi Dövlət Proqramı»nın hazırlanması barədə dövlət başçısının tapşırıqlarını xatırladan E. Aslanov hər bir gənci bununla bağlı öz təkliflərini irəli sürməyə çağırıb. PA rəsmisi ən yaxşı, rasional təkliflərin proqramda nəzərə alınacağını qeyd edib.