Sosial

Ana səhifə

Sosial

Azərbaycanda “Sosial xidmət haqqında” qanun qəbul olunacaq

10 may 2011 08:54 (UTC +04:00)

APA-nın xəbərinə görə, bunu jurnalistlərə açıqlamasında Milli Məclisin (MM) Sosial Siyasət Komitəsinin sədri Hadı Rəcəbli bildirib. Komitə sədri deyib ki, qanun layihəsi parlamentin müzakirəsinə təqdim olunub, sənədin MM-in yaz sessiyasının sonuna kimi müzakirəyə çıxarılması gözlənilir. H. Rəcəblinin sözlərinə görə, layihədə Azərbaycanda sosial xidmətlə təkcə dövlət qurumlarının deyil, qeyri-hökumət təşkilatlarının da məşğul olması nəzərdə tutulur: “Bu, böyük bir addımdır. Qanunun qəbulundan sonra bu xidmətlərin böyük bir hissəsi tender vasitəsi ilə QHT-lərə veriləcək. Dünyanın bir çox ölkəsində belə təcrübə var. Əmək və Əhalinin Sosial Müdafiəsi Nazirliyi bu layihəni bəyənib”.

Komitə sədri Beynəlxalq Qızıl Xaç və Qırmızı Aypara cəmiyyətlərinin də dünya miqyasında sosial xidmətlər həyata keçirilməsi ilə bağlı təcrübəsinin olduğunu xatırladıb.

H. Rəcəbli qeyd edib ki, qanunun qəbulundan sonra sosial xidmətlərin keyfiyyəti yaxşılaşacaq, səmərəliliyi artacaq: “Mayın 8-də bizim bir sıra QHT-lərin təmsilçiləri ilə görüşümüz oldu, layihə ilə bağlı onların da təkliflərini öyrəndik”.

Komitə sədri MM-də pasientlərin hüquqlarının qorunması haqqında da qanun layihəsinin hazırlandığını deyib. Onun sözlərinə görə, bu qanunda həkimlərin hüquqlarının müdafiəsi barədə də müddəalar olacaq.