Sosial

Ana səhifə

Sosial

TQDK Moskva Dövlət Beynəlxalq Əlaqələr İnstitutuna Azərbaycan vətəndaşları üçün tələbə qəbulu elan edib

10 may 2011 16:46 (UTC +04:00)

Bakı. Sevil Valehova-APA. Rusiya Federasiyası Xarici İşlər Nazirliyinin Moskva Dövlət Beynəlxalq Əlaqələr İnstitutunda (Universitetində) Azərbaycan Respublikası vətəndaşlarının təhsil alması üçün 3 yer ayrılıb. Tələbə Qəbulu üzrə Dövlət Komissiyasının (TQDK) mətbuat xidmətindən APA-ya verilən məlumata görə, imtahanda iştirak etmək istəyən abituriyentlər Azərbaycanın ali təhsil müəssisələrinin qəbul imtahanında iştirak etmək üçün doldurduqları “Elektron ərizə”ni təsdiq etdirdikdən sonra TQDK-da təşkil edilmiş Sənəd Qəbulu Komissiyasında qeydiyyatdan keçməlidirlər (Qeydiyyat mayın 11-dən 18-dək hər gün saat 10:00-dan 17:00-dək aparılır.

İmtahanda iştirak etmək hüququna attestat qiymətləri 4 və 5 olan Azərbaycan vətəndaşları malikdirlər. Ali məktəb tələbəsi və ya məzunu olan şəxslər bu imtahanda iştirak etmək hüququna malik deyillər. Müsabiqədə iştirak etmək üçün abituriyentlərin TQDK-da təşkil edilmiş Sənəd Qəbulu Komissiyasında qeydiyyatdan keçmələri tələb olunur. Qeydiyyat mayın 11-dən 18-dək hər gün saat 10:00-dan 17:00-dək aparılır.

Müsabiqə iki mərhələdən ibarətdir. 1-ci mərhələdə abituriyentlər öz seçimləri əsasında TQDK tərəfindən keçiriləcək test imtahanında iştirak edəcəklər. “Beynəlxalq iqtisadi əlaqələr” və “Beynəlxalq münasibətlər” ixtisasına qəbul olmaq istəyənlər II ixtisas qrupu üzrə, “Beynəlxalq hüquq” ixtisasına qəbul olmaq istəyənlər III ixtisas qrupu (DT altqrupu) üzrə imtahan verəcəklər.

Test imtahanında bölməsindən asılı olmayaraq abituriyentlərə test tapşırıqları rus dilində təqdim olunacaq. Abituriyentlər xarici dil fənni kimi yalnız ingilis dilini seçə bilərlər.
Test imtahanı 2011-ci il mayın 21-də keçiriləcək. Abituriyentlər “İmtahana buraxılış vərəqəsi”ni mayın 19 -20-də TQDK-nın internet saytından çap edib götürəcəklər.

Test imtahanı nəticəsində 500 və daha yüksək bal toplayan abituriyentlər müsahibəyə buraxılacaqlar. Müsahibə mayın 23-də keçiriləcək. Müsahibədə Azərbaycan bölməsi abituriyentlərinin rus dilini, rus bölməsi abituriyentlərinin isə Azərbaycan dilini bilmə səviyyəsi (müvafiq dillərdə inşa yazmaqla), eləcə də ümumi dünyagörüşü yoxlanacaq.
Müsabiqədə ən yüksək nəticə göstərən 3 nəfərin namizədliyi MDBƏİ-yə ödənişsiz təhsil forması üzrə təhsil alması üçün təqdim olunacaq.

2-ci mərhələ MDBƏİ tərəfindən Moskva şəhərində iyunun 27-dən iyul un 3-dək aparılacaq. Bu mərhələdə abituriyentlər seçdikləri fakültədən asılı olmayaraq rus və ingilis dillərindən test imtahanı verəcəklər. “Beynəlxalq iqtisadı əlaqələr fakültəsi”nə qəbul olmaq istəyənlər bundan əlavə riyaziyyatdan da imtahan verməlidirlər.