Sosial

Ana səhifə

Sosial

Məzun və tələbələr üçün “Karyerada ilk addım” devizi altında məşğulluq tədbiri keçirilir

13 may 2011 11:47 (UTC +04:00)

Bakı. Sevil Valehova - APA-Economics. Əmək və Əhalinin Sosial Müdafiəsi Nazirliyi (ƏƏSMN) yanında Dövlət Məşğulluq Xidməti mayın 13-də “Qafqaz” Universitetində məzun və tələbələrin əmək bazarına inteqrasiyası məqsədilə “Karyerada ilk addım” devizi altında növbəti aktiv məşğulluq tədbiri təşkil edib.

ƏƏSMN-in ictimaiyyətlə əlaqələr şöbəsindən “APA-Economics”ə verilən məlumata görə, tədbirdə 27-si dövlət, 62-si özəl sektor olmaqla 89 müəssisə tərəfindən 813 boş (vakant) iş yeri təqdim edilib.

Tədbirin gedişində işaxtaran tələbə və məzunlar üçün işaxtaranların sosial adaptasiyası üçün məsləhət otağı fəaliyyət göstərib. Məsləhət otağının köməyi ilə tələbə və məzunlara iş axtarmağın metodologiyası aşılanıb, onlara işaxtarma şəbəkəsini müəyyənləşdirmək, özünü təqdimat, müsahibəyə hazırlaşmaq, xülasə hazırlamaq və s. barədə məsləhətlər, mövcud əmək bazarı haqqında məlumatlar verilib. Eyni zamanda tədbirdə Dövlət Məşğulluq Xidmətinin məlumat bazasında mövcud olan boş iş yerləri də işaxtaranların seçiminə təqdim edilib. Tədbirdə işsiz və işaxtaranların müvəqqəti xarakterli işlərlə təmin olunması məqsədilə Əmək Birjası da iştirak edəcək.

Məzun və tələbələr üçün növbəti “Karyerada ilk addım” devizi altında belə tədbirlər mayın 20-də Gəncə şəhərində Azərbaycan Dövlət Aqrar Universitetində, mayın 27-də isə Bakıda Azərbaycan Əmək və Sosial Münasibətlər Akademiyasında keçiriləcək.