Sosial

Ana səhifə

Sosial

ABŞ prezidenti əhalini fövqəladə hallar barədə SMS-lə xəbərdar edəcək

16 may 2011 07:16 (UTC +04:00)

Bakı. Əli Əhmədov - APA-Economics. ABŞ-ın Federal Rabitə Komissiyası (FCC) fövqəladə hallar haqqında SMS-bildiriş servisi hazırlayıb.

«APA-Economics»in «Infox.ru»ya istinadən məlumatına görə, PLAN (Personal Localized Alerting Network) adlanan bu servis tam pulsuzdur və işə salınması üçün istifadəçidən heç bir hərəkət tələb etmir.

PLAN insanların yaşadıqları ərazilərdə mümkün ola biləcək təbii fəlakətlər haqqında onları qabaqcadan məlumatlandırmaq imkanı verir. Nəticədə vətəndaşların təbii fəlakətdən xilas olmaq üçün hər hansı tədbir görməyə vaxtları olur.

ABŞ-ın üç ən böyük mobil rabitə operatorları “Verizon Wireless”, “AT&T” və “Sprint” şirkətləri ilə sistemin təşkil olunmasına dair müqavilə imzalanıb. Bir qədər sonra layihəyə “T-Mobile” şirkətinin də qoşulacağı gözlənilir. PLAN servisinin ABŞ-ın ən sıx əhalili şəhəri olan Nyu-Yorkda ilin sonuna kimi sınaqdan keçirilməsi nəzərdə tutulur. Bütün ölkə miqyasında isə sistemin 2012-ci ilin yanvar ayının 1-dən mart ayının 31-dək tətbiqi planlaşdırılır.

PLAN çərçivəsində mobil telefon istifadəçilərinə 3 növ SMS-lər göndəriləcək. Bunlar fövqəladə hal və ya hadisə haqqında informasiya, ABŞ Prezidenti Xidmətindən bildiriş, eləcə də itən və ya oğurlanan insanların axtarılması üçün işlənib hazırlanmış Amber Alert sistemindən məlumatlardır. Abunəçilər öz mobil telefonunda prezident adından göndərilən bildirişlərdən başqa digərlərindən imtina edə bilər.

Qeyd edək ki, PLAN servisi indiyədək mövcud olan televiziya və radio vasitəsilə bildiriş sistemlərinin davamı kimi yaradılıb. Əvvəlkilərdən fərqli olaraq, PLAN daha səyyardır və abunəçi lazımi məlumatı olduğu yerdən asılı olmayaraq alacaq.